MANISPAA YA UBUNGO YATOA KADI MAALUMA KWA MAWAKALA WA MABASI WA KITUO CHA MAGUFULI

Posted on: May 16th, 2023

Mawakala wa Mabasi yaendayo mikoani wa Kituo cha Mabasi cha Magufuli Manispaa ya Ubungo wamepatiwa kadi maalum zitakazo wawezesha kuingia ndani ya kituo hicho bila malipo ya ziada.

Ambapo hapo awali mawakala hao walikuwa wakihitajika kulipia getini kiasi cha shilingi 300 kila wanapoingia ndani ya kituo hicho kwa ajili ya kupeleka abiria kwenye mabasi wanayoyafanyia kazi kitendo ambacho kwao ilikuwa ni kero kubwa, ambapo kwa sasa watalipia mara moja tu kiasi hicho na kuendelea kuingia bure wakiwa na kadi hiyo kwa siku nzima.

Kadi hizo kwa awamu ya kwanza wamepatiwa leo tarehe 16/05/2023 na Mwenyekiti wa Chama cha Mapinduzi CCM Mkoa wa Dar es Salaam Mhe. Abbas Zuberi Mtemvu alipotembelea kituo hicho akiwa na timu ya wajumbe wa Kamati ya siasa ya Mkoa huo kwa lengo la kutembelea mradi wa ujenzi wa mageti ya kielektroniki katika kituo hicho.

Mradi huo ulijengwa kwa lengo la kuzuia mianya ya upotevu wa mapato ya kituo hicho ambapo hadi kukamilika kwake utagharimu kiasi cha shilingi Bilioni 1.6 ambazo ni fedha za mapato ta ndani ya Manispaa hiyo na umeshakamilika kwa asilimia 95 ambapo umeanza kufanya kazi katika mageti 11 ya kuingilia na 6 ya kutokea.

Mhe. Mtemvu ameipongeza Manispaa hiyo kwa jitahida za kutoa kadi hizo ambazo zinaenda kutatua kero hiyo kwa mawakala wa kituo hicho na ametoa wiki mbili ili kukamilisha zoezi hilo na amewataka wamiliki wa mabasi kuhakikisha taarifa zinazohitajika za mawakala wao ziwasilishwe haraka ili zoezi la utoaji wa vitambulisho hivyo likamilike ndani ya wiki mbili.

Kwa upande wake Mkuu wa Wilaya ya Ubungo Mhe. Hashim Komba amesema ofisi yake kwa kushirikiana na ofisi ya Mkurugenzi wa Manispaa hiyo itaendelea kuhakikisha kero yeyote itakayo jitokeza inashughulikiwa ndani ya wakati ili watumiaji wa kituo hicho watoe na kupata huduma kwenye mazingira rafiki.

Mhe. Komba ameendelea kueleza kuwa Manispaa ya Ubungo inampango wa kuboresha kituo hicho kwa kuongeza mageti ya kielektroniki ili kuwezesha wananchi kupata huduma hiyo kwa uharaka na hivyo kusaidia wamiliki wa mabasi yanayoingia ndani ya kituo hicho kupata abiria kwa wakati

@ccm_dsm