ARDA YAWAKUMBUKA WATU WENYE ULEMAVU WA NGOZI UBUNGO

Posted on: February 9th, 2022

Shirika la msaada la adventista wasabato (ADRA- Adventist Developments Relief Agency) kwa kushirikiana na Manispaa ya Ubungo wameandaa mafunzo ya mradi wa lishe na ugawaji wa vifaa vya kilimo kwa watu wenye ulemavu wa ngozi lengo ikiwa ni kuwawezesha kupata lishe bora na  kuwawezasha kiuchumi.

Msimamizi wa shirika la ARDA Tanzania Dina Bina ameeleza shirika limepanga kusaidia jamii kutokana na changamoto ya COVID 19 kwa kutoa elimu ya ulimaji wa mbogamboga kwa kundi la watu wenye ulemavu ili kusaidia kupata lishe bora.

Bina ameeleza sambamba na mafunzo hayo ARDA itatoa vifaa vya ulimaji wa mboga mboga hizo ambavyo ni mifuko 20 ya kupandia kwa kila mtu, tray za vitalu, vijembe, garden tools, gloves na mbegu za kuanzia. Ili kusaidia kundi hili la watu wenye ulemavu wa ngozi kuepukana na utegemezi.

Afisa Maendeleo ya Jamii Manispaa ya Ubungo Albina Mtumbuka ameeleza kuwa watu hao wanaweza kuwa na vikundi vya ujasiriamali na kufanya miradi mbalimbali ambayo itawasaidia katika kupata mikopo isiyo na riba ya kukuza biashara zao. Kwani Manispaa imekuwa ikitoa mikopo hiyo kwa makundi ya wanawake, vijana na watu wenye ulemavu kupitia mapato yake ya ndani.

Naye Mhandisi wa Kilimo Mkoa wa Dar es salaam Rajab Omary amewapongeza ARDA kwa juhudi zao za kuisaidia serikali kwa kutoa misaada kwa jamii na amewaasa wanufaika hao kwenda kuyafanyia kazi mafunzo waliyoyapata, na kuunda vikundi mbalimbali vya ujasiriamali.

Omary ameeleza Manispaa zote zimetenga maeneo kwa ajili ya kutumika kama shamba darasa hivyo amewaasa kufanya juhudi katika kuhudumia bustani hizo za mbogamboga ili kupata fursa ya kuyatumia vizuri maeneo hayo kwa lengo la kuwawezesha kujikimu kimaisha na kiuchumi.

Nae Mwenyekiti wa watu wenye ulemavu wa ngozi Ubungo amewapongeza ARDA kwa kuwakumbuka kwa kuwapatia mafunzo na vifaa vya upandaji wa mboga mboga kwani utaenda kuimarisha afya zao na kukuza uchumi wao na ameishukuru Manispaa kwa kutenga maeneo ya shamba darasa.