BARAZA LA MADIWANI UBUNGO LALIA NA UBOVU WA MIUNDOMBINU

Posted on: May 4th, 2021

Baraza la Madiwani la Manispaa ya Ubungo leo tarehe 4 Mei, 2021 limesema changamoto ya ubovu wa barabara, madaraja, vivuko na miundombinu ya shule imekuwa kero kubwa kwa wananchi wa manispaa hiyo hasa kipindi hiki cha mvua.

Kauli hiyo imetolewa na wajumbe wa mkutano Baraza hilo kwenye mkutano wa baraza wa kuwasilisha  taarifa za utekelezaji wa shughuli mbalimbali za maendeleo katika kata zao kwa kipindi cha  robo ya tatu kuanzia mwezi januari Hadi Machi mwaka huu ambapo changamoto ya  ubovu wa barabara na miundombinu ya shule imejitokeza katika kata nyingi.

Wakizungumza kwa nyakati tofauti Madiwani hao wamesema kuwa hali ya miundombinu ya barabara hasa kipindi hiki cha mvua ni mbaya na hazipitiki,  wananchi wanapata shida sana hivyo " tunawaomba TARURA wafanye matengenezo ya barabara, madaraja na vivuko  kwa wakati ili kuwaondolea adha wananchi wetu"

Aidha kuhusu uchakavu wa miundombinu kwa baadhi ya shule, wajumbe wa Baraza hilo wameeleza kuwa pamoja na jitihada zinazofanywa na Manispaa pamoja na Serikali kuu ya kujenga na kukarabati Madarasa, vyoo na ununuzi wa madawati bado kuna kuna uhitaji wa Madarasa katika shule za Manispaa hiyo hivyo manipaa kwa kushirikiana na wadau iendelee kutenga bajeti ya ujenzi wa miundombinu hiyo.

Kata ya Goba na Saranga ni kati ya kata zilizoboreshawa miundombinu ya shule ikiwemo ujenzi wa Madarasa na kupelekewa madawati  katika shule zake kupitia fedha za mapato ya ndani, Diwani wa kata hiyo Ester Ndoha amemshukuru Mkurugenzi wa manispaa hiyo kwa ujenzi huo ambao umesaidia upunguza changamoto ya wanafunzi kukaa chini na ameomba juhudi hizo ziendee kwani changamoto hiyo bado ipo.

Kwa mwaka wa fedha 2020/2021 kwa upande wa Elimu Sekondari Halmashauri ya manispaa ya ubungo imeweza  kujenga Madarasa 42 yenye thamani ya shilingi milioni 675, madawati 1700 yenye thamani ya shilingi milioni 125 na matundu ya vyoo 24 yenye thamani ya shilingi milioni 24.2

Aidha Manispaa ilipokea madawati 340 kutoka Kwa wadau wa maendeleo NMB, CRDB na UNBOUND Community Tanzani.

Kwa upande wa  shule za msingi, Halmashauri ya manispaa ya ubungo kupitia fedha za mapato ya ndani imeweza kujenga madarasa 42  yenya thamani ya shilingi milioni 607, ukarabati wa madarasa 13 kwa gharama ya shilingi milioni 37, ujenzi wa vyoo matundu 22 kwa gharama ya shilingi milioni 33 na utengenezaji wa madawati 1707 yenye thamani ya shilingi milioni 87.

Akifunga mkutano wa baraza hilo, Mstahiki Meya wa Halmashauri ya Manispaa hiyo Jaffary Juma Nyaigesha ameeleza kuwa ili kuboresha maisha ya wananchi baraza hilo lina wajibu wa kushirikiana na wadau wa maendeleo wakiwemo TARURA, DAWASA, TANESCO na wengine ili kuhakiksha kero hizo zinatatulika kwa wakati ili kujenga Imani kwa serikali yao ambayo iliahidi kutatua kero za zao.