BENKI YA DUNIA YAKAGUA MIRADI YA DMDP UBUNGO

Posted on: November 18th, 2025

Timu ya Wataalamu kutoka Benki ya Dunia inayosimamia utekelezaji wa Mradi wa Jiji la Dar es Salaam Awamu ya Pili (Dar es Salaam Metropolitan Development Project – DMDP Phase Two) imefanya ziara ya kukagua maendeleo ya ujenzi wa barabara zinazoendelea kujengwa katika Manispaa ya Ubungo kwa mikataba ya awamu ya kwanza na awamu ya Tatu.

Mradi huo wa barabara, ambao ulianza kutekelezwa mwezi Januari 2025, unahusisha ujenzi na upanuzi wa mtandao wa barabara zenye urefu wa zaidi ya kilomita 31.99 katika maeneo mbalimbali ndani ya Manispaa hii ya Ubungo. Katika ziara ya leo, jumla ya barabara 8 zilitembelewa, ikiwemo Barabara ya Msumi yenye urefu wa kilomita 9.83, pamoja na barabara za Posta Matembe, Sheikh Bofu, Msikitini, Sinza KKKT, Ubungo NHC, Segesera Pamoja na Barabara ya Juma Ikangaa.

Wataalamu hao walipongeza hatua zilizofikiwa hadi sasa. Pia wamesisitiza umuhimu wa kuendelea kusimamia ubora wa kazi na kuharakisha maeneo yanayoonekana kuchelewa ili kufikia malengo ya mradi kukamilika kwa wakati. Aidha, timu imetoa Ushauri kwa Waratibu wa mradi, Mhandisi Mshauri na Wakandarasi kuhakikisha mfumo wa kushughulikia malalamiko ya wananchi unafanya kazi ipasavyo.

“Tunahimiza ufuatiliaji wa karibu katika ngazi zote na kutatua changamoto wanazowasilisha wananchi kwa wakati, hususan zile zinazohusu usalama wa wafanyakazi na wakazi wanaoishi jirani na maeneo ya ujenzi,” alisema mmoja wa wataalamu kutoka Benki ya Dunia.

Ziara hiyo ilihusisha Waratibu wa Mradi, Mhandisi Mshauri, Wakandarasi pamoja na Timu ya Utekelezaji wa Mradi kutoka Ubungo.

Mradi wa DMDP unatarajiwa kuimarisha upatikanaji wa huduma za usafiri, kuongeza usalama barabarani na kuchochea maendeleo ya kiuchumi katika Manispaa ya Ubungo na maeneo jirani.