DC BOMBOKO ATOA SIKU 7 MITAA YOTE 90 KUWA SAFI

Posted on: September 30th, 2024

Mkuu wa wilaya ya Ubungo Mh. Hassan Bomboko ametoa siku saba kwa Viongozi na Idara ya Mazingira wilaya ya Ubungo kuhakikisha mitaa yote 90 inakuwa safi huku akiagiza kuwepo kwa uratibu mzuri wa ukusanyaji taka.

Mh. Bomboko ametoa maagizo hayo Septemba 30, 2024 wakati wa kikao chake cha kusikiliza na kutatua kero za wananchi kilichohusisha Mabalozi na Wenyeviti wa mitaa kata ya Kimara, Wenyeviti na Makatibu wa CCM kata ya Kimara, pamoja na wakuu wa Idara na vitengo wilaya ya Ubungo.

Bomboko amelazimika kutoa maagizo hayo baada ya kuibuka kwa kero kubwa ya utupaji taka hovyo, kutozolewa kwa wakati na uchomaji taka unaosababisha moshi mwingi na kuleta kero kwa wananchi.

Amesema utatuzi wa kero hizo kwa wananchi ndiyo ushindi wa CCM katika uchaguzi wa serikali za mitaa kwa kuwa serikali imejidhatiti kuondoa kero na changamoto zote.

Pamoja na mambo mengine, amewaagiza Watu wa mipango miji kuhakikisha zoezi la Urasimishaji maeneo linafanyika kikamilifu baada ya kuibuka kero ya Mipango miji na uvamizi wa maeneo.

Awali Diwani wa kata ya Kimara ndg. Ismail Mvungi, amesema serikali imetenga jumla ya shilingi Bilioni 18 kwaajili ya kujenga barabara zote za Kimara zikiwemo Barabara za Kimara- Bonyokwa, Kimara Baruti, Barabara ya Kilungule, na barabara ya Golani primary.

Amesema kupitia fedha za ndani, Kata ya Kimara imepokea Milioni 60 kwaajili ya ujenzi wa barabara za Kimara - Baruti Cam college, Tembo, Kilungule, Java na Mbuyuni.

Pamoja na mipango yote hiyo ya ujenzi wa  Barabara, DC Bomboko ameagiza kutengenezwa mpango maalumu wa kupunguza athari za ubovu wa barabara katika kata ya Kimara.

Katika hatua nyingine, Mabalozi na wenyeviti wa mitaa waliibua hoja ya changamoto ya upatikanaji wa maji kwa zaidi ya miezi mitatu katika mitaa ya Golani, CCM Kimara Baruti, Mtaa wa kipemba, na Ngoi, ambapo DC Bomboko ameagiza DAWASA kufika na kukagua maeneo yote ambayo maji hayatoki, na kuhakikisha mitaa hiyo inapata maji haraka 

Sambamba na hilo, amemuelekeza Katibu tawala wa wilaya ya Ubungo kuziandikia barua mamlaka zote za maji kutoa taarifa kila siku kuhusu hali ya upatikanaji wa maji katika Kata ya mitaa