DC KHERI AKAGUA BARABARA ZA TARURA UBUNGO

Posted on: June 23rd, 2022

Mkuu wa Wilaya ya Ubungo Mhe. Kheri James akiwa ameambatana na timu ya wataalamu wa Manispaa na TARURA , leo Juni 23, 2022 amekagua miradi sita ya barabara zinazojengwa na Wakala wa Barabara za mjini na  Vijijini (TARURA) yenye thamani ya shilingi bilioni tatu lengo ikiwa ni kujiridhisha na hatua ya utekelezaji wake ili barabara hizo zianze kutumika

Katika ziara hiyo  miradi iliyotembelewa ni pamoja na  barabara ya kawawa yenye  urefu wa KM 2 inayojengwa kwa kiwango cha lami (Gogoni - Kiluvya), daraja la Msigani, daraja la Mwakajila, daraja la Kimara B kwa Rama, barabara ya Suca - Golani, Millenia tatu pamoja na Barabara ya Midizini

Katika ukaguzi huo, Mhe. Kheri ameridhishwa na utekelezaji wa  miradi hiyo na amewaagiza TARURA kukamilisha miradi yote hiyo kwa wakati  kwa mujibu wa mikataba  ili wananchi waanze kutumia kwani barabara  inarahisisha na kuharakisha  huduma  na maendeleo kwa wananchi na Taifa kwa ujumla.

Sambamba na hilo, Mhe. Kheri amewaeleza  Wananchi wanaoishi pembezoni mwa barabara inayotoka Suca-Golani  ambao wamepitiwa na barabara hiyo wameombwa kuachia maeneo yao kwa hiyari bila fidia ili kuharakisha kuanza kwa zoezi la ujenzi wa barabara hiyo kwa kiwango cha lami ambapo ujenzi huo utagahrimu shilingi bilioni 16.

"Mradi huu utakua na faida kubwa sana kwa Wananchi wote wanaotumia barabara hii hasa kipindi cha mvua ambapo mawasiliano huwa yanakatika. Hivyo basi niwaombe wananchi wote ambao maeneo yao yameguswa japo kidogo kuyachia ili mradi huu utekelezwe kwa haraka na viwango" alisema

Wakati Serikali inawajibika kujenga miundombinu ya barabara, Mhe. DC amewataka wananchi kulinda miundombinu ili idumu

Aidha, Mhe. Kheri amemshukuru Rais wa Jamhuri ya Muungano wa Tanzania Mhe. Samia Suluhu Hassan kwa miradi mbalimbali ya maendeleo inayoendelea kutekelezwa ndani ya wikaya ya Ubungo na pia amewaomba wananchi wa Wilaya ya Ubungo kuendelea kutoa ushirikiano wa dhati kwa Serikali yao hasa kwenye utekelezaji wa miradi hiyo ya maendeleo.

#UbungoYetuFahariYetu