DC KOMBA AFANYA KIKAO NA WAKANDARASI WA TAKA, ASISITIZA UWAJIBIKAJI WA WATUMISHI WA UMMA

Posted on: November 29th, 2023

Katika kuendelea kuimarisha mikakati ya kuboresha hali ya usafi wa mazingira katika mitaa yote 90 ya Manispaa ya Ubungo, Novemba 29, 2023 mkuu wa wilaya ya Ubungo Mhe. Hashim Komba amefanya kikao maalumu na wakandarasi wa taka kutoka katika mitaa yote

Lengo kuu la kikao hicho ni lilikua kujadili changamoto mbalimbali zinazowakabili wakandarasi hao na kutengeneza mkakati wa pamoja wa kuzitatua changamoto hizo ili kuongeza kasi ya usafi

Akiongea katika kikao hicho DC Komba amesema "kwetu Ubungo Usafi ni ajenda ya kudumu ya kila siku, popote zinapokuepo taka ni lazima ziondolewe haraka ili kuwaepusha wananchi na uchafu wa mazingira pamoja na uwezekano wa mlipuko wa magonjwa" alisema Komba

Wakichangia katika kikao hicho wakandarasi wameonesha kukwamishwa na mfumo wa tausi katika ufanyikaji wa malipo, wengi wakilalamika kutolipwa malipo yao toka mwezi Septemba, malalamiko ambayo mweka hazina wa Manispaa hiyo ndugu Mohabe ametoa ufafanuzi kuwa fedha hizo tayari zilisharudishwa katika ngazi ya kata tayari kwaajili ya malipo

Aidha kwa upande mwingine DC Komba ameagiza ndani ya siku mbili kuanzia kesho idara ya utumishi kwa kushirikiana na idara ya fedha kufanya uchambuzi wa taarifa za malipo ya wakandarasi hao kwa mitaa yote ili kufahamu aina za changamoto na namna ya kuzisuluhisha

Nae mstahiki.Meya wa Manispaa ya Ubungo Mhe. Jaffery Nyaigesha ameonesha kuguswa na changamoto za wakandarasi hao na amesisitiza maafisa ugani kwenye ngazi za mitaa na kata hasa maafisa afya kufuatilia kwa kina taratibu zote za usafi na kusaidia kutatua changamoto zote zinazojitokeza