DC KOMBA AHAMASISHA UBALOZI WA USAFI KWENYE KAU- SAPEU GOBA

Posted on: November 25th, 2023

Usafi ni Ustaarabu, usafi ni uungwana, usafi ni utu, usafi ni kinga, usafi ni Heshima, hivyo basi nichukua fursa hii kuhamasisha wananchi wenzangu wa Goba na wilaya ya Ubungo kwa ujumla kuwa ni vema falsafa hii ya usafi wa mazingira ikatuingia sote akilini na kuitekeleza kwa vitendo" hayo yamesemwa na mkuu wa wilaya ya Ubungo Mhe. Hashim Komba alipokua anaongea na wananchi waliojitokeza katika jumamosi ya usafi wa mwisho wa mwezi katika eneo la Goba center kata ya Goba  Novemba 25, 2023

Komba amesisitiza wananchi kuwa na utamaduni wa kuhakikisha maeneo yao kwa kila mmoja yanakuwa masafi wakati wote ili kuweka mazingira kuwa nadhifu yenye kupendeza na kuondokana na kunyemelewa na magonjwa ya mlipuko yanayosababisha kuzorota kwa afya zetu na kuathiri uchumi wa mtu mmoja mmoja na taifa kwa ujumla

Awali akitoa salamu katibu tawala wilaya ya Ubungo Ndg, Hassan Mkwawa amewapongeza wananchi wa kata ya Goba kwa kujitokeza kwa wingi katika kampeni hiyo na amewaomba kuendeleza utamaduni huo kila siku katika maeneo yao

Kampeni hiyo ya usafi wa mazingira ni mfululizo wa kampeni mama ya Kataa Uchafu, Safisha Pendezesha Ubungo KAU - SAPEU ambayo imejielekeza zaidi kwenye kushindanisha mitaa yote 90 kwa usafi ambapo hivi karibuni utafanyika mkutano wa kwanza wa tahmini baada ya miezi mitatu ya kwanza na mshindi wa kwanza atapatiwa shilingi 600,000, mshindi wa pili shilingi 400,000 na mshindi wa tatu shilingi 300,000

Ikumbukwe tathmini kubwa zaidi ya kampeni hiyo itafanyika baada ya miezi 6 ambapo mtaa utakaoibuka na ushindi utapatiwa pikipiki mbili ambapo moja itakua mali ya mwenyekiti  na nyingine mali ya ofisi ya mtaa huo. Huku mtaa utakaokuwa mchafu zaidi utakabidhiwa bendera ya balozi wa uchafu Ubungo

Nae katibu wa chama cha mapinduzi wilaya ya Ubungo Ndg, Mwenge Msunga amempongeza DC Komba kwa ubunifu mkubwa wa kampeni hiyo na wao kama chama tawala wapo tayari kumpa ushirikiano wa dhati wakati wote