DC MSANDO ATEMBELEA MRADI WA MAJI KING'ONG'O, AONGEZA MUDA KWA DAWASA KUKAMILISHA KWA UBORA

Posted on: October 13th, 2025

Na Mwandishi Wetu, UbungoOktoba 13, 2025 – Dar es Salaam

Mkuu wa Wilaya ya Ubungo, Mheshimiwa Albert Msando, leo amefanya ziara ya ukaguzi katika eneo la Michungwani, Kata ya Saranga, kufuatilia utekelezaji wa mradi wa uboreshaji wa huduma ya maji unaogharimu Shilingi milioni 364, unaotekelezwa na Mamlaka ya Majisafi na Usafi wa Mazingira Dar es Salaam (DAWASA).

Mradi huo unaolenga kuboresha upatikanaji wa maji safi kwa wakazi wa mitaa ya King’ong’o, Michungwani na Kimara B, unatarajiwa kunufaisha zaidi ya wananchi 92,000 katika umbali wa takriban kilomita 3.6.

Katika Mazungumzo yake baada ya kukagua uchimbaji wa mitaro kwaajili ya usambazaji wa mabomba, Mh. Msando amemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kutoa fedha za utekelezaji wa miradi ya maendeleo, hususan miradi ya maji inayogusa maisha ya wananchi moja kwa moja.

Amesema uamuzi wa serikali umeonyesha dhamira ya kweli katika kutatua changamoto za msingi zinazowakabili wananchi.

Kutokana na umuhimu wa mradi huo na changamoto ya upatikanaji wa maji kwa wananchi, Mh. Msando aliielekeza DAWASA kuongeza muda wa utekelezaji wa mradi huo kutoka siku 10 hadi siku 21. Alieleza kuwa uamuzi huo unalenga kuhakikisha kazi inafanyika kwa viwango vya juu na kwa ubora utakaodumu.

"Nia yetu si kukamilisha kwa haraka tu, bali kuhakikisha wananchi wanapata huduma bora, inayodumu na yenye kuleta unafuu wa kweli kwa maisha yao," alisema Msando.

Kwa upande wake, Mkuu wa kitengo cha Mazingira DAWASA aliyemwakilisha Kaimu Afisa Mtendaji Mkuu DAWASA Mhandisi Modester Mushi amewahakikishia wananchi na uongozi wa wilaya kuwa kazi hiyo itafanyika kwa kasi kubwa, mchana na usiku, ili kuhakikisha wananchi wanapata huduma hiyo muhimu kwa wakati na kwa ubora unaostahili. Alisisitiza kuwa DAWASA iko tayari kutekeleza maono ya Mhe. Rais ya kuhakikisha kila Mtanzania anapata huduma ya maji safi na salama.

Naye Mwenyekiti wa Serikali ya mtaa ya Michungwani Bw. Sergius Kinyero, amesema ujio wa mradi huo ni mkombozi mkubwa kwa wananchi wake