DC UBUNGO ATAKA HUDUMA BORA KWA WANANCHI

Posted on: January 2nd, 2024

Mkuu wa Wilaya ya Ubungo Mhe. Hashim Komba amewataka watumishi wa Wilaya hiyo sambamba na Taasisi mbalimbali za Serikali zilizopo ndani ya Wilaya hiyo kuhakikisha wanatoa huduma stahiki kwa wananchi lengo ikiwa ni kuhakikisha dhima ya Serikali ya kutoa huduma bora kwa wananchi inafanikiwa.

Agizo hilo amelitoa tarehe 02/01/2024 alipokuwa kwenye kikao kazi kilichojumuisha watumishi mbalimbali wa Wilaya hiyo wakiwemo na Maafisa watendaji Kata na Mitaa, Waganga wafawidhi, Wakuu wa Shule, na wataalamu wa DAWASA, TANESCO na TARURA.

Mhe. Komba ameendelea kueleza kuwa muelekeo wa Wilaya hiyo kwa mwaka 2024 ni kuhakikisha huduma stahiki zinatolewa kwa wananchi sambamba na kuondoa michango isiyo na uhalisia mashuleni, kuondoa malalamiko ya wananchi juu ya utoaji mbovu wa huduma za afya, kuhakikisha wananchi wanapata huduma ya umeme na maji ipaswavyo sambamba na kuhakikisha miundombinu ya barabara inaboreshwa.

Kwa upande mwengine Mhe Komba ameitaka Wilaya hiyo mbali na kutoa vitambulisho vya kadi za matibabu kwa wazee lakini pia kutenga bajeti kutoka kwenye mapato yake ya ndani kwa ajili ya kuwezesha mfuko wa matibabu ya bure ya wazee hao ili kusaidia kuondoa changamoto za matibabu kwa wazee.

“Serikali chini ya uongozi wa Rais. Dkt Samia Suluhu Hassan imefanya mambo mengi mazuri katika kuhakikisha huduma zinaboreshwa changamoto kubwa iliyopo ni baadhi ya watumishi ambao wamekuwa ni kikwazo cha kuichonganisha Serikali na wananchi wake kwa sababu tu ya utoaji mbovu wa huduma kwa wananchi, kutekeleza ujenzi wa miradi isiyo na viwango, changamoto ya umeme na maji, watumishi wa aina hiyo sitawavumilia fanyeni kazi kwa weledi kwa maslahi ya wananchi” alisisitiza Mhe. Komba.

Kwa upande wake Mkurugenzi wa Manispaa hiyo Elias Runeye Ntiruhungwa amesema Manispaa hiyo inaendelea kuhakikisha huduma mbalimbali ikiwemo huduma za afya na elimu zinaendelea kuboreshwa huku wananchi wakienndelea kuwezeshwa kuyokana na mikopo ya asilimia 10 pamoja na uboreshaji wa miundombinu ya barabara kwa lengo la kuhakikisha wananchi wanapata huduma bora.