FEB 15 CHANJO YA SULUA RUBELA UBUNGO

Posted on: February 12th, 2024

Mkuu wa Wilaya ya Ubungo Mhe. Hashimu Komba amewataka wazazi na walezi kuhakikisha watoto wote wenye umri wa kuanzia miezi 9 na usiozidi miaka mitano kuhakikisha wanapatiwa chanjo ya Surua na Rubella inayotarajiwa kutolewa hivi karibuni

Hayo yameelezwa na Mwenyekiti wa baraza la Kamati ya ushauri la Wilaya ya Ubungo Mhe. Hashimu Komba ambae ni Mkuu wa Wilaya hiyo alipokuwa kwenye Baraza hilo lililofanyika leo tarehe 12/02/2024 katika ukumbi wa mikutano wa Manispaa hiyo kwa ajili ya kupitisha makisio ya mpango na bajeti ya mwaka wa fedha 2024/2025 lililohudhuliwa na viongozi mbalimbali wa vyama vya siasa, viongozi wa dini, kamati ya ulinzi ya Wilaya na viongozi mbalimbali wa Wilaya hiyo.

Pamoja na hayo Mhe. Komba amewataka wajumbe wa baraza hilo kuwa mabalozi wa kuelimisha jamii juu ya umuhimu wa kampeni hiyo katika jamii hususani kwa watoto.

Kwa upande wake Mkuu wa Idara ya Afya Dkt. Tulitweni Mwinuka ameeleza kuwa Wizara ya Afya, OR-TAMISEMI  kwa kushirikiana na wadau wa maendeleo imeandaa kampeni ya Kitaifa ya kutoa Chanjo ya Surua na Rubella kwa watoto hao lengo ikiwa ni kuwakinga na kuwalinda dhidi ya madhara yanayotokana na magonjwa hayo.

Dkt. Tulitweni ameendelea kueleza kuwa kampeni hii itafanyika Nchi nzima kuanzia tarehe 15-18 Februari, 2024 katika Vituo vya kutolea huduma za chanjo na maeneo maalumu yaliyoandaliwa ikiwemo masoko, Shule, nyumba za ibada, mashambani, vituo vya mabasi, kambi za wakimbizi,  kambi za wavuvi au sehemu ambazo kuna watoto na vituo vya mipakani.

Akiongelea madhara ya magonjwa hayo Dr. Tulitweni ameeleza ugonjwa wa surua na rubella usababisha madhara makubwa kwa watoto waliokwenye umri wa chini ya miaka mitano na hata vifo, hivyo watoto wote watapatiwa chanjo hii hata kama wameshapata chanjo katika utaratibu wa kawaida wa kutoa huduma za chanjo.