HAKUNA KIFO CHA MAMA MJAMZITO UBUNGO OKTOBA HADI DISEMBA

Posted on: March 21st, 2024

Bodi ya afya Manispaa ya Ubungo imeipongeza Manispaaa hiyo kwa utoaji bora wa huduma za afya hasa ikiwemo huduma ya mama na mtoto ambapo kwa kipindi cha robo ya pili kuanzia mwezi oktoba mpaka disemba 2023 hakuna kifo cha mama kilichotokana na uzazi.

Akizungumza wakati wa kupokea taarifa ya utekelezaji wa shughuli za idara ya afya ustawi wa jamii na lishe katika kipindi hicho, mwenyekiti wa bodi hiyo ndugu Allan Sempoli amesema kuwa kutokuwa na kifo cha mama wakati wa kujifungua kwa kipindi cha miezi mitatu ni ishara kuwa wataalamu wa afya wanafanya kazi kwa weledi mkubwa na kujitoa sana kwa wananchi.

Sempole amesema kuwa juhudi zilizotumika kuzuia vifo vya mama wajawazito wakati wa kujifungua ziende sambamba na kuzuia vifo vya watoto wachanga kwa kuendelea kutoa elimu kwa wajawazito kuhudhuria mapema kliniki, kutumia dawa za kuongeza damu, lishe bora na kutumia dawa za malaria kwani ndio visababishi vikubwa vya vifo vya watoto wachanga au watoto kuzaliwa kabla ya wakati (njiti).

“Najua mnafanya kazi kubwa wataalamu wa afya lakini baodi inawasisitiza kuweka mipango mahususi ya kupunguza vifo hivi 37 vya watoto wachanga vilivyotokea katia kipindi hiki cha miezi mitatu” alielekeza Sempole.

Aidha, Kutokana na wagonjwa wengi wenye maambukizi ya HIV kutorudi kwenye huduma, wajumbe wa bodi wameshauri idara ya afya kuja na utaratibu mzuri zaidi wa kuwafatilia wagonjwa hao ili waendelee kupata huduma kwani katika kipindi cha miezi mitatu ni wateja 59 tu kati 2316 waliorudi kupata huduma za matibabu.

Kuhusu lishe, bodi imepongeza zoezi la utoaji wa chakula kwenye shule 247 kati 259 za msingi na sekondari sawa na 95.3%  kwani ndio msingi wa kuwa na jamii yenye afya kiakili na kimwili, hivyo bodi za shule zipewe elimu zaidi kuhakikisha wazazi wanachangia chakula shuleni ili kila mtoto apate chakula akiwa shule.

 Akiwasilisha taarifa ya utekelezaji wa idara hiyo, mganga Mkuu wa manispaa hiyo Dkt. Tulitweni Mwinuka maeeleza kuwa, Manispaa hiyo ina jumla ya vituo 263 kati ya hivyo  24 ni vya serikali na 239 ni binafsi.