HIZI HAPA SIFA ZA KUKUWEZESHA KUPATA MKOPO WA HALMASHAURI KWAAJILI YA VIJANA, WANAWAKE NA WENYE ULEMAVU.

Posted on: October 2nd, 2024

Mkuu wa Idara ya maendeleo ya jamii, Manispaa ya Ubungo Bi. Rose Mpeleta amesema Serikali ya awamu ya sita chini ya Dkt. Samia Suluhu Hassan imefanya maboresho ya kanuni mpya za mikopo ya halmashauri za mwaka 2024 zinazotolewa kwa mujibu wa sheria ya fedha za serikali za mitaa namba 290.

Chini ya sheria hiyo, Mamlaka za serikali za mitaa zinawajibika kutenga asilimia kumi ya mapato yasiyolindwa yanayokusanywa kutoka kwenye vyanzo vya ndani vya mapato kwaajili ya kutoa mikopo kwa vikundi vilivyosajiliwa vya wanawake, vijana na watu wenye ulemavu.

Amesema, kwa mujibu wa kanuni za utoaji na usimamizi wa mikopo, ili kikundi kiweze kupata mkopo kinapaswa wanakikundi wake wawe ni raia wa Tanzania wenye akili timamu na umri wa miaka 18 na kuendelea na kwa kundi la vijana wawe na umri wa kuanzia miaka 18 hadi 45.

Sifa nyingine ni kutambuliwa na Mamlaka za serikali za mitaa kupitia mfumo wa kielektroniki wa utoaji na usimamizi wa mikopo, kiwe kinajishughulisha na ujasiriamali, ambapo kwa kikundi cha wanawake au vijana kiwe na idadi ya wanakikundi wasiopungua watano na kikundi cha wenye ulemavu kisipungue watu wawili.

Hata hivyo amesisitiza kuwa, kikundi lazima kiwe  na akaunti ya benki iliyofunguliwa kwa jina la kikundi, kiwe kimepata mafunzo na kisijumuishe wajumbe wenye ajira rasmi.