KAMATI YA CAMFED CDC UBUNGO YAPITISHA MAJINA YA WAZABUNI

Posted on: January 28th, 2026

Kamati ya Maendeleo ya Jamii (CDC) ya Shirika la CAMFED Wilaya ya Ubungo imepitisha majina ya wazabuni walioomba zabuni ya kusambaza vifaa vya wanafunzi, vikiwemo madaftari, sare za shule (uniform) na viatu, kwa ajili ya wanafunzi wa kike 334 wanaofadhiliwa na shirika hilo wilayani humo.

Uamuzi huo umefikiwa katika kikao cha robo ya kwanza ya mwaka 2026 cha kamati hiyo, kilicholenga kuimarisha uratibu, mipango na usimamizi wa utekelezaji wa programu za kusaidia wanafunzi wa kike wanaoishi katika mazingira magumu Wilaya ya Ubungo.

Akifungua kikao hicho kilichofanyika Januari 28, 2026 katika ukumbi wa Shule ya Wasichana ya Dar es Salaam, Mwenyekiti wa kikao hicho, Ndugu Benedict Sandy, alisema kikao hicho kimewakutanisha wajumbe ili kufanya tathmini ya utekelezaji wa shughuli za robo ya nne ya mwaka 2025 pamoja na kuweka mikakati ya utekelezaji wa shughuli za robo mpya ikiwemo kujadili na kupendekeza majina ya wazabuni watakaoleta vifaa vya wanafunzi hao.

Katika kikao hicho, Mwenyekiti aliwasisitiza wajumbe wa Kamati ya Maendeleo ya Jamii (CDC) kutekeleza majukumu yao ipasavyo kwa kuzingatia uwajibikaji, uadilifu na ufanisi, ili kuhakikisha wanafunzi wa kike wanaonufaika na ufadhili wa CAMFED wanapata elimu bora na yenye tija kwa kupatiwa vifaa vyenye ubora na kwa wakati. Alisisitiza kuwa usimamizi madhubuti wa shughuli za kamati ni msingi muhimu wa kufanikisha malengo ya kielimu ya wanafunzi hao.

Mwenyekiti ameeleza kuwa “Kwa kuwa  muhula mpya wa masomo umeanza, kamati iliona umuhimu wa kufanya maamuzi ya haraka kuhusu upatikanaji wa vifaa muhimu vya wanafunzi ili kuhakikisha hakuna mwanafunzi anayekosa mahitaji ya msingi ya masomo”. Hatua hiyo inalenga kuwawezesha wanafunzi hao kuendelea na masomo yao bila vikwazo vinavyoweza kusababishwa na uhaba wa vifaa vya kujifunzia.

Shirika la CAMFED linaendelea kujihusisha na kusaidia wanafunzi wa kike wanaoishi katika mazingira magumu ambao hushindwa kupata haki yao ya msingi ya elimu. Kupitia ufadhili wake, wanafunzi hao huwezeshwa kupata mahitaji mbalimbali ikiwemo nauli na fedha za chakula, hatua inayowawezesha kuhudhuria masomo yao kwa ufanisi