KAYA MASKINI ZAIDI YA 500 UBUNGO KUNUIFAKA NA BIMA YA (UHIF), SERIKALI YATAMBULISHA BIMA KWA WOTE

Posted on: February 1st, 2026

Serikali ya Jamhuri ya Muungano wa Tanzania imeendelea kuchukua hatua madhubuti katika kuboresha huduma za afya kwa wananchi wake na kwa awamu ya kwanza serikali imetambulisha bima ya UHIF ( UNIVERSAL HEALTH INSURANCE FUND) ambayo imeanza kwa kugusa kaya maskini kwa kuwapa bima hiyo bila ya malipo ambapo kaya zaidi ya 500 zinatarajiwa kufikiwa kwa wilaya ya Ubungo,  ikiwa na uwezo wa kufanya kazi mwaka mzima na mnufaika akiendelea kupata huduma bure Katika Hospitali zote za Serikali

Kwa Wilaya ya Ubungo kufikia  tarehe 10 februari, 2026 kaya zaidi ya 100 zimeshafikiwa na wananchi hao wameishukuru serikali kwa kuwaona na kuwajali kwani afya ni mtaji

Zoezi hili la utoaji wa bima ya afya (UHIF) kitaifa imeanza rasmi tarehe 1 Februari 2016, ikiwa ni sehemu ya mkakati wa kitaifa wa kuimarisha ustawi wa jamii na kupunguza umaskini. Walengwa wakuu wa bima hii ni kaya maskini zilizonufaika na Mfuko wa Maendeleo ya Jamii (TASAF), ambao mara nyingi hukabiliwa na changamoto kubwa za kugharamia matibabu.

Kwa upande wa Wilaya ya Ubungo, utekelezaji wa bima ya afya ya UHIF umeanza rasmi tarehe 9 Februari 2026. Kuanzishwa kwa bima hii  kunatarajiwa kuongeza upatikanaji wa huduma za afya kwa kaya nyingi maskini na kupunguza mzigo wa gharama za matibabu kwa familia husika.

Akizungumza katika Zoezi hili, afisa uanachama mwandamizi Ndg. Gwerino Wisa amesema  bima ya afya ya UHIF inachukua jumla ya watu  6 kwa kaya moja huku Serikali ikiwa imelipia gharama hizo na wananchi kupata matibabu vituo vyote vya afya vya serikali kwanzia ngazi ya zahanati mpaka hospitali ya Taifa Kwa rufaa.

Aidha mratibu wa bima za Afya wilaya ya Ubungo Bi. Leticia Meena amesema Kwa ujumla, bima ya afya ya UHIF ni hatua muhimu katika safari ya kuelekea huduma za afya bure kwa wote. Ushirikiano kati ya serikali na programu kama TASAF unaonesha dhamira ya dhati ya kuhakikisha hakuna mwananchi anayebaki nyuma katika kupata huduma muhimu za kijamii, hususan huduma za afya.