KITUO CHA EACLC CHAKAMILIKA 85% , KAMATI YATEMBELEA

Posted on: February 18th, 2025

Kamati ya Fedha na Uongozi Manispaa ya Ubungo imefanya ziara katika kituo kikubwa cha biashara Afrika mashariki ( East Africa Commerce and Logistic Center) kilichopo ilipokuwa stendi ya mabasi ya Ubungo hapo awali na kujionea hali ya ujenzi inayoendelea katika kituo hicho ambapo ujenzi wake mpaka sasa umekamilika kwa asilimia 85 na kuagiza kituo kuendelea kutangazwa zaidi ili wananchi na wafanyabiashara kutoka katika maeneo tofauti waendelee kuja kupanga na kuchukua fremu katika kituo hicho  kikubwa cha kibiashara

Ziara hiyo imefanyika  februari 18, 2025 ambapo wajumbe walitoa maoni tofauti ikiwemo kasi ya kukitangaza kituo hicho iweze kuongezeka ili wananchi na wafanyabiashara waweze kutambua umuhimu wa kituo hicho kibiashara ambacho lengo kuu ni kukuza uchumi wa taifa na kuleta maendeleo kwa taifa

Wakati wa ziara hiyo pia wajumbe waliweza kuonesha maduka yaliyopo katika kituo hicho ambacho kinategemewa kufunguliwa mwezi wa tano na ujenzi wake kwa sasa upo katika hatua za kukamilisha katika ghorofa ya 3 na 4 ukiwa unaendelea.

Akizungumza katika ziara hiyo Mstashiki Meya Manispaa ya Ubungo ambaye pia ni mwenyekiti wa kamati ya Fedha amesema Manispaa inaendelea kutoa ushirikiano mzuri kwa kituo hicho kwa kuhakikisha kinaendelea kutangazwa na mpaka sasa juhudi zinaendelea kuonekana katika vyombo mbalimbali vya habari  vinavyoendelea kukitangaza kituo hicho.

Aidha, kamati imetembelea Shule ya msingi Kibamba ambapo kuna madarasa 14 yaliyojengwa na kanisa la Yesu Kristo la  Watakatifu wa siku za mwisho na kuwashukuru kanisa hilo kwa kuendelea kutoa misaada mbalimbali kwa Ubungo ambapo wananchi wanaendelea kunufaika na mradi huo ambao umewezesha wanafunzi kusoma katika mazingira mazuri