LAAC YAFURAHISHWA NA MIPANGO ZA MANISPAA YA UBUNGO JUU YA SOKO LA MABIBO.

Posted on: March 17th, 2023

Kamati ya kudumu ya Bunge ya hesabu za Serikali za mitaa (LAAC) imeipongeza Manispaa ya Ubungo kwa juhudi za kuhakikisha soko la Mabibo kuwa ni soko lenye kuwanufaisha wananchi wote wa Manispaa hiyo.

Pongezi hizo amezitoa leo Mwenyekiti wa Kamati hiyo Mhe. Halima Mdee Mbunge wa Viti Maalum Mkoa wa Dar es Salaam wakati wa ziara waliyoifanya ndani ya Manispaa hiyo.

Hayo yamejiri kufuatia suala la eneo la soko hilo ambalo hapo awali lilikabidhiwa kwa viongozi wa soko hilo na baadae kupelekea kutoweza kusimamia vyema soko hilo kwa maana ya kutokutoa taarifa za mapato na matumizi, na kutosimamia vyema usafi na utunzaji wa mazingira ya soko hilo na kupelekea mazingira hatarishi kwa wananchi na wajasiriamali kwa ujumla ndani ya soko hilo

Akifafanua suala hilo Mkurugenzi wa Manispaa amesema soko hilo kwa sasa lipo chini ya eneo la kiwanda cha nguo Urafiki na tayari pande zote kwa maana ya Manispaa na Kiwanda hicho wamekubaliana soko hilo lisimamiwe na Manispaa hiyo na kwa sasa taratibu zingine zinaendelea kufuatwa ikiwemo ya kupata umiliki halali wa soko kwa maslahi ya wananchi kwani tayari Serikali imeamua soko lisimamiwe na Manispaa hiyo.

Kamati hiyo imeitaka wizara ya TAMISEMI kwa kushirikiana na Wizara ya Ardhi kuhakikisha kuwa suala la umiliki wa ardhi ya soko hilo linafanyiwa kazi haraka ili kuondoa mvutano uliopo na mchakato wa kuliendeleza soko hilo uendelee kwa maslahi ya watanzania.

“Nimefurahishwa na hatua ya halmashauri ya Ubungo kushirikisha wadau wote wa soko wanashirikishwa juu ya uendeshwaji wa soko hilo na wote kwa pamoja kuona ni vyema soko hilo lisimamiwe na Manispaa kwa maslahi ya wananchi wote” alisema Mdee.

Kwa upande wake Mhe. Jesca Msambatavangu Mbunge wa Iringa Mjini amesema Serikali lazima ione umuhimu wa haraka wakuhakikisha suala hili linaisha kwa kuhakikisha Manispaa inapata hati na kulisimamia vyema soko hilo kwa maslahi ya wananchi wetu.

“Eneo hilo tayari kwa sasa lina wajasiriamali wengi na bado mara kadhaa Manispaa imekuwa ikihakikisha soko hilo linakuwa na mazingira salama kwa maana ya usafi wa soko hilo kwani wajibu wa Serikali ni kuwahudumia wananchi” alisema Mhe. Msambatavangu.

Kamati hiyo imefanikiwa kutembelea Mradi wa nyumba za kupangisha (Ghorofa) ambazo Manispaa hiyo inapata mgao wa mapato yake zilizopo eneo la Oysterbay.