MAADHIMISHO YA LISHE YAWAGUSA VIJANA

Posted on: October 30th, 2023

Wakati Taifa linaadhimisha siku ya lishe kitaifa kwa kaulimbiu isemayo "Lishe Bora kwa Vijana Balehe, Chachu ya Maendeleo yao" Halmashauri ya Manispaa ya Ubungo imekuwa ikitekeleza kwa vitendo kaulimbiu hiyo kwa kutoa elimu ya lishe pamoja na kuhamasisha kuanzisha bustani  za mbogamboga katika shule za msingi na sekondari kwa ajili ya chakula.

Hayo yameelezwa  tarehe 30 oktoba,2023 na Afisa lishe Manispaa ya Ubungo Beatrice Mossile kwenye maadhimisho ya lishe kitaifa ambapo kwa Manispaa ya Ubungo yamefanyika katika Mtaa wa king’azi kata ya kwembe na kueleza kuwa maadhimisho hayo ni muhimu sana kwa vijana kwani ndio nguvu kazi ya jamii na Taifa kwa ujumla

Mossile Aliendelea kueleza kuwa, vizuri kuzingatia lishe bora ambayo ndiyo msingi wa maendeleo ya ukuzaji wa uchumi.

Mossile amesema kuwa, Halmashauri imekuwa ikitoa elimu kupitia kamati ya lishe ya Manispaa ambapo baadhi ya shule zimehamasishwa kuanzisha bustani za mbogamboga kwa ajili ya chakula, kuwapa elimu kwa walimu wakuu, wakuu wa shule na wanafunzi ili kujenga uelewa kwa kundi hilo muhimu kwa kuzingatia lishe bora kwa ajili ya  kuwa na afya njema kimwili na kiakili.

Aliendelea kusema kuwa, Katika maonesho hayo Walengwa ni vijana wa miaka 10 hadi 19 kwani ndio umri  wa balehe na ndio kipindi cha mpito na tabia za ulaji usiofaa  huweza kujengeka  ikiwemo ulaji wa vyakula vyenye mafuta, sukari na chumvi kwa wingi na kutokula mbogamboga na matunda kwa wingi kutokana na uhuru wa kujichagulia vyakula

Aidha,Kulingana na takwimu za sensa za mwaka 2022, inaonesha kuwa asilimia 25 ni vijana wa umri kuanzia miaka 10 hadi 19 na wanakabiliwa na hali mbaya ya lishe, ikiwemo upungufu wa madini joto na unene ulikithiri ndio maana wamama wajawazito wanasisitizwa kuzingatia siku 1000 kwa mtoto kwa kula vyakula vyenye lishe ili kuwa na watoto wenye afya bora.

Nae, Lightness Mtega mwanafunzi wa Shule ya Wasichana ya Dar es Salaam Girls akiwakilisha vijana hao ameleza kuwa maadhimisho haya ni muhimu sana kwa vijana kwani ndio nguvu kazi ya jamii na taifa kwa ujumla hivyo ni vizuri kuzingatia lishe bora ambayo ndiyo msingi wa maendeleo.

Afisa lishe  Manispaa ya Ubungo Beatrice Mossile katika kilele cha maadhimisho ya siku ya lishe kitaifa ambapo Manispaa ya Ubungo iliadhimisha katika Kata ya Kwembe