MAAFISA HABARI HAKIKISHENI MNATANGAZA UTEKELEZAJI WA MIRADI KWA WANANCHI

Posted on: May 24th, 2025

Waziri wa Nchi, Ofisi ya Rais-TAMISEMI Mhe. Mohamed Mchengerwa amewataka Maafisa Habari  Sekretarieti za Mikoa na Mamlaka za Serikali za Mitaa kuhakikisha wananchi wanapata taarifa  sahihi za utekelezaji wa miradi ya maendeleo inayotekelezwa na Serikali katika maeneo yao ya kazi

Waziri Mchengerwa ametoa wito huo wakati akifungua kikao kazi cha siku mbili cha Maafisa Habari wa Mikoa, Mamlaka za Serikali za Mitaa na Taasisi za Ofisi ya Rais-TAMISEMI kilichofanyika katika Ukumbi wa Jiji la Dodoma uliopo kwenye Mji wa Serikali Mtumba jijini Dodoma.

"Kila Afisa Habari atangaze mazuri yaliyofanywa na Serikali kwani mmebeba dhamana kubwa ya kuhakikisha wananchi wanapata habari sahihi hivyo msiwaache watanzania walishwe habari potofu” Mhe. Mchengerwa amesisitiza.

Mhe. Mchengerwa amesema kuwa, Maafisa Habari nchini ni rasilimaliwatu muhimu hivyo wakitambua wajibu wao na kujiimarisha kiutendaji ni wazi kuwa wananchi watapata taarifa sahihi kwa wakati zikiwa na hamasa na ushuhuda wa manufaa ya  kazi zilizotekelezwa 

Waziri Mchengera amewahimiza Maafisa hao kuwa "Iwapo kila mmoja wenu akiwa mzalendo na kutambua wajibu wake, habari mtakazozitoa ndio zitaaminiwa na kupokelewa na watanzania kupitia vyombo vya habari na mitandao ya kijamii ambayo inatumiwa na wananchi kwa kikwango kikubwa kupata habari ,”

Waziri mchengerwa amesema, ana amini kwamba maafisa habari waliopo wana weledi na ujuzi unaowawezesha kutoa taarifa sahihi zenye tija kwa wananchi na maendeleo ya taifa kwa ujumla.

Kikao kazi cha Maafisa habari kinafanyika kwa siku mbili katika ukumbi wa Jiji Dodoma, na baada ya kikao kazi, Maafisa watatembelea na kuona miradi ya Maendeleo inayoendelea kutekelezwa katika Mkoa wa Dodoma