MAAFISA MAENDELEO YA JAMII UBUNGO WAJENGEWA UWEZO KUHUSU HUDUMA ZA LISHE NA TASAF

Posted on: April 9th, 2024

Maafisa maendeleo ya jamii Manispaa ya Ubungo  waaswa kuendelea kutoa elimu kwa jamii na kaya za Tasaf kuhusiana na huduma bora za lishe kwa kuzingatia ulaji wa makundi muhimu ya chakula sambamba na kuzingatia usafi 

Mafunzo hayo yametolewa tarehe 9/4/2024 na Afisa lishe Manispaa ya Ubungo Beatrice Mossile akitoa elimu kwa maafisa maendeleo kuhusu umuhimu wa kutoa elimu kwa jamii kuzingatia masuala ya huduma za  lishe

Akizungumza Mossile amesema kuwa ni muhimu jamii ikaelezwa umuhimu wa kuzingatia usafi majumbani, sehemu za biashara na maeneo yaliyowazunguka lengo likiwa ni kuwaepusha na magonjwa ya milipuko ikiwemo kipindupindu

Aliendelea kuwasisitiza kwenda kutoa elimu kwa jamii  kuhusu lishe inayozingatia makundi sita ya vyakula ambavyo hutengeneza mlo kamili ambao kila mwanadamu anastahili kuvipata.

Vyakula vya mafuta mengi, vyakula vilivyosindikwa na vyenye sukari si salama kwa afya ya jamii hivyo ni muhimu jamii ikapewe elimu waweze kula kwa kiasi ili kujiepusha na maradhi. Alisisitiza Mossile

Mkaendelee kuwakumbusha jamii kuwa "kunywa maji ni muhimu kwa kulinda Afya ya mwili na tuepukane na kunywa dawa bila ya ushauri wa daktari" alisisitiza Mossile

Aidha, Afisa kilimo Linais Njau Manispaa ya Ubungo amezungumzia kuhusiana na kilimo cha mjini na  kuwataka maafisa maendeleo kutoa elimu kwa jamii kuhusiana na kilimo cha mjini ambacho kina faida nyingi hasa katika kuwezesha kujikwamua kiuchumi, lishe ya nyumbani na faida nyingine mbalimbali

"Kilimo sio lazima kiwe Kijijini hata mjini unaweza kufanya kilimo cha kisasa na hata majumbani kikatumika kama maua kwa ajili ya kupendezesha nyumba" aliendelea kusisitiza Njau