MAKABURI 15 ENEO LA MBEZI KWA YUSUFU YAHAMISHWA

Posted on: March 23rd, 2022

Wakala wa Barabara Tanzania (TANROAD) Kwa kushirikiana na Halmashauri ya Manispaa ya Ubungo imefanya zoezi la kuhamisha makaburi 15 yaliyopo Mtaa wa Mbezi kwa Yusufu  kata ya Msigani ili kupisha uendelezaji wa  mradi wa  ujenzi wa barabara ya njia nane.

Zoezi hilo lililofanyika  leo Machi 23,2022 limegharimu kiasi cha shilingi milioni kumi na laki tano(10,500,000) kwa ajili ya kulipa  gharama ya usumbufu wa kuhamisha  makaburi kwa ndugu wa marehemu, kufukua na kuchimba makaburi mapya na gharama za  mazishi.

Akitoa ufafanuzi wa utaratibu wa kuhamisha makaburi hayo, Afisa Afya wa Manispaa Boniface Katikiro amesema kila familia imelipwa shilingi laki Tatu (300,000) kama fidia ya usumbufu wa kuhamisha kaburi la ndugu yao.

Amesema kuwa miili ya marehemu 15 imefukuliwa na Kati ya hiyo miili 13 imezikwa katika  makaburi ya mshikamano yaliyopo Mtaa wa mshikamano kata ya Mbezi huku miili miwili ikisafirishwa mikoani  na ndugu zao.

Akiongea baada ya zoezi hilo Mwenyekiti wa Mtaa wa Mbezi kwa Yusufu Gasper Misibo ameipongezi Halmashauri, TANROAD na ndugu wa marehemu  Kwa kufanikisha zoezi hilo kufanyika kwa amani na kupelekea mradi wa ujenzi wa barabara ya njia  nane kuendelea kama ilivyopangwa.