MANISPAA YA UBUNGO YASAINI MKATABA WA USHIRIKIANO NA KAMPUNI YA LANCET LABORATORIES

Posted on: February 6th, 2020

Halmashauri ya Manispaa ya Ubungo yasaini Mkataba wa kuingia Ushirikiano na kampuni ya LANCET LABORATORIES kwa lengo la kutanua Maabara, kuongeza aina na idadi ya vipimo vitakavyokuwa vikifanyika hospitali ya Sinza. Zoezi hilo limefanyika katika hospitali ya Sinza  Palestina na kuhudhuriwa na Mkurugenzi wa Manispaa Beatrice Dominic, Mganga Mkuu wa Manispaa Dr. Peter Nsanya, Mwanasheria wa Manispaa Kissah Mbilla , baadhi ya watumishi wa hospitali hiyo, Meneja Mkuu wa Lancet Laboratories Ndg. Nassoro Salim na baadhi ya wafanyakazi wa Lancet.

Mganga Mkuu wa Manispaa Dr. Peter Nsanya alisema kwamba Manispaa imesaini Mkataba huo sio tu kwa manufaa ya wananchi wanaoishi ubungo bali kwa wananchi wote wa Dar es salaam na Tanzania kwa ujumla. "Niseme tu kwamba vipimo vitakavyokuwa vinapimwa hapa si chini ya vipimo mia tatu ikiwemo  cancer na homa ya ini" aliongeza Mganga Mkuu.

Nae Meneja Lancet Tanzania Ndg. Nassoro Salim alisema kuwa ni siku ya furaha sana kwake kwa kufanikisha Lancet kufanya kazi na Manispaa ya Ubungo. Alisema yote ni kuhakikisha wananchi wanapata huduma bora za vipimo.

Mkurugenzi wa Manispaa ya Ubungo Beatrice Dominic alimshukuru Meneja wa Lancet Tanzania kwa kukubali kusaini Mkataba wa Mashirikiano. Alisema kuwa lengo la serikali ya awamu ya tano ni kuboresha huduma kwa wananchi hasa kwenye sekta ya Afya na ndicho kinachofanyika. "Niwaahidi Lancet kuwa tutatoa ushirikiano wa kutosha, na nitoe rai kwa watumishi wote kushirikiana vizuri na Lancet. Tayari tumeshafanya mazungumzo na benki ya NMB ili wawepo hapa na malipo yote yawe yanafanyika benki". Aliongeza Mkurugenzi.

Aidha Mkurugenzi alisema baada ya mwezi mmojahospitali ya Sinza itaanza kupokea wagonjwa ambao walikuwa hawafiki hospitalini hapo kwa hofu ya kutokuwepo baadhi ya vipimo na hii sio tu kwamba itaboresha huduma bali pia itasaidia kuongeza mapato.