MARUFUKU WENYEVITI WA SERIKALI ZA MITAA KUGONGA MIHURI NYARAKA ZA MAUZIANO YA ARDHI

Posted on: February 11th, 2026

Katazo hilo limetolewa na Mkuu wa Wilaya ya Ubungo Mhe. Wakili Albert Msando  tarehe 11 Februari 2026 wakati akitoa salamu za Serikali kwa Baraza la Madiwani  ambapo amewataka Wenyeviti wote wa Mitaa kutopiga mihuri ya Serikali kama mashahidi katika suala zima la mauziano ya ardhi ili kuepuka migogoro inayotokea mara kwa mara.

Akizungumza katika Baraza la Madiwani la robo ya pili ya mwaka 2025/2026  Mkuu wa Wilaya ya Ubungo Mhe. Wakili Albert Msando amesema baadhi ya Wenyeviti wamekuwa wakiweka mihuri kushuhudia mauzo wakati wanafahamu fika eneo lina mgogoro au limeuzwa mara mbili. Hali hii inasababishia watu kutapeliwa na Serikali kuhusishwa kwamba ilishiriki kuthibitisha.

Katika hatua nyingine, Wakili Msando ametoa rai kwa wananchi wote ambao wana nia ya kununua ardhi ndani ya Wilaya ya Ubungo, kufika katika ofisi za ardhi za Manispaa ya Ubungo ili kufata taratibu za kitaalamu kuepuka migogoro mingi ya ardhi.