MASHINDANO YA SHIMISEMITA 2023 YAFUNGWA RASMI LEO

Posted on: October 30th, 2023

Mashindano ya Shirikisho la Michezo Serikali za Mitaa Tanzania ‘SHIMISEMITA’  yaliyoenda sambamba na kauli mbiu isemayo “Imarisha Afya Na Mahusiano Kazini Kwa Maendeleo ya Nchi” yaliyokuwa yakiendelea Mkoani Dodoma katika viwanja vya Jamhuri na Dodoma Sekondari yamefungwa rasmi  tarehe 30/10/2023.

Akiongea wakati anafunga mashindano hayo naibu Katibu Mkuu TAMISEMI Dkt. Edwin Msonde amezitaka Halmashauri zote Nchini kuhakikisha zinashiriki kikamirifu mashindano hayo ambayo hufanyika kila mwaka.

“Michezo inaimarisha afya, mahusiano, uzalendo na inadumisha utamaduni wetu, hata mara baada ya mashindano haya msiache michezo muwapo kwenye Halmashauri zenu” Alisisitiza Msonde

Aidha, Msonde amewapongeza Viongozi wote walioandaa mashindano hayo ambayo yanatija kwa watumishi na Taifa kwa ujumla kama ambavyo kauli mbiu inajieleza.

Sambamba na pongezi hizo pia Msonde amezipongeza Halmashauri zote zilizoshiriki Mashindano hayo ambapo watumishi mbalimbali wana michezo wamepata fursa ya kuimarisha mahusiano na watumishi wa Halmashauri zingine Nchini.

Akisoma taarifa ya mashindano hayo Katibu Mkuu wa SHIMISEMITA Taifa Ndg. Henry Kapela ameeleza kuwa mashindano hayo ambayo yalianza rasmi mnamo tarehe 18/10/2023 yakiwa na jumla ya Halmashauri 72 zilizoshiriki zenye zaidi ya wanamichezo ‘watumishi’ 1500.

Kapela ameeleza kuwa katika mashindano hayo michezo mbalimbali imeshindaniwa ukiwemo mchezo wa riadha, mpira wa pete, mpira wa miguu, valleyball, handball, kuvuta kamba, karata, bao, darts, drafti, pooltable, ngoma za asili na uchoraji ambapo washindi wa michezo hiyo wamepatiwa zawadi mbalimbali ikiwemo makombe na medali.

Kwa upande wake Mwenyekiti wa SHIMISEMITA Taifa Mhe. Jeshi Lupembe ameipongeza TAMISEMI kwa kuruhusu watumishi hayo kushiriki mashindano hayo

Halmashauri ya Manispaa ya Ubungo ni moja kati ya Halamshauri ambazo zimeshiriki mashindano hayo na kufanikiwa kupata cheti cha ushiriki

Aidha, timu ya netiball ya Manispaa hiyo ilifanikiwa kufika hatua ya robo fainali ambapo ilitolewa kwa tofauti ya goli 25 - 21 dhidi ya Ilala Jiji

pichani ni viongozi walioshiriki katika ufungaji wa michezo ya Shimisemita Dodoma