MEWAKA DAY YAZINDULIWA UBUNGO, WALIMU WAPATIWA MAFUNZO YA MABADILIKO YA MTAALA KWA MASOMO YA SAYANSI NA KIINGEREZA

Posted on: March 2nd, 2024

Katika muendelezo wa maboresho ya Mtaala wa Elimu nchini Tanzania, Manispaa ya Ubungo imetekeleza mafunzo kwa walimu wa shule za msingi za Serikali na binafsi ili kuwajengea uwezo mzuri wa kuendana na mabadiliko hayo.

Hayo yamesemwa na Afisa Elimu ya Awali na Msingi Manispaa ya Ubungo ndugu Denis Nyoni wakati akifungua mafunzo hayo katika kituo cha mafunzo cha Kibamba TRC tarehe 1 Machi, 2024 kwa walimu washiriki kutoka shule mbalimbali za serikali na binafsi za Manispaa ya Ubungo

Mafunzo hayo yanatolewa chini ya programu ya MEWAKA (Mafunzo Endelevu ya Walimu Kazini) ambayo lengo lake kubwa ni kuwajengea walimu uwezo kwenye masomo wanayofundisha wakiwa katika vituo vyao vya kazi.

Mafunzo ya mtaala ulioboreshwa yanafanyika nchi nzima kwa muda wa siku mbili kuanzia tarehe 1 - 2 Machi, 2024 ambapo kwa awamu hii walengwa wa mafunzo  ni walinu wa masomo ya Sayansi na Kiingereza wanaofundisha darasa la tatu mpaka darasa la sita

Akiongea katika mafunzo hayo mwezeshaji wa mafunzo Pendo Gadi amesema "Mafunzo haya yatakuwa chachu kubwa kwa walimu washiriki ambapo watapitishwa kwenye mabadiliko mbalimbali yaliyojitokeza kwenye mtaala wa elimu ulioboreshwa" alisema Gadi.

mafunzo hayo ya siku mbili kwa Manispaa ya Ubungo yanafanyika katika vituo vikuu vitatu vya mafunzo ambavyo ni kituo cha Kibamba TRC, Mbezi TRC pamoja na Ubungo Plaza TRC ambapo Serikali imetoa jumla ya shilingi 27,136,000/= kwa ajili ya kugharamia mafunzo hayo

Naye Mratibu wa mafunzo hayo Manispaa ya Ubungo mwalimu Flora Ulomi amewapongeza walimu wanaoshiriki huku akiwataka kuhakikisha wanashiriki vema mafunzo hayo ili wakawe mabalozi wazuri wa mabadiliko ya mtaala kwenye vituo vyao vya kazi na hatimaye matokeo chanya yaonekane kwa Manispaa ya Ubungo na Taifa kwa ujumla.