MHE. YENGA ASHINDA NAFASI YA NAIBU MEYA UBUNGO 2023/2024.

Posted on: August 11th, 2023

Baraza la mwaka la uchaguzi wa Naibu Meya lililofanyika tarehe 11/08/2023 katika ukumbi wa Manispaa ya Ubungo limemchagua Mhe. Yusuph Omary Yenga Diwani wa Kata ya Mburahati kuwa Naibu Meya wa Manispaa hiyo kwa mwaka 2023/2024.

Mhe. Yenga amepata ushindi huo kwa jumla ya kura 18 alizozipata kutoka kwa wapiga kura ambao ni Madiwani wa Manispaa hiyo.

Katika uchaguzi huo Mhe. Yenga ni mgombea pekee aliyepitishwa na chama chake ambacho ni Chama cha Mapinduzi CCM kwa kuzingatia sheria kanuni na taratibu za uchaguzi huo. Manispaa ya Ubungo ina jumla ya Kata 14 na zenye Madiwani wanaotokana na Chama cha Mapinduzi CCM na jumla ya Madiwani wanne wa viti maalum na hivyo kuifanya Manispaa hiyo kuwa na jumla ya Madiwani 18 na katika uchaguzi huo Mhe. Yenga ameshinda kwa kupata kura za ndio 18 na hakuna kura iliyoharibika wala kukataliwa.

Akiongea baada ya ushindi huo Mhe. Yenga amewashukuru Madiwani hao kwa kumpa kura za ndio na kuendelea kumwamini kuwa Naibu Meya wa Manispaa hiyo kwa awamu nyengine na ameahidi kuendelea kuwapa ushirikiano wakutosha kwa kipindi chote cha uongozi wake.

Mbali na Manispaa kuwa na Mstahiki Meya wa Manispaa hiyo bado ina wajibu wa kufanya uchaguzi wa kuchagua Naibu Mstahiki Meya kila baada ya mwaka wa Fedha kuisha ambae ataongoza kwa kipindi cha mwaka mmoja wa Fedha.