MKUMBO AFANYA ZIARA JIMBO LA UBUNGO

Posted on: December 23rd, 2023

Desemba 23, 2023 Mbunge wa Jimbo la Ubungo Mhe. Prof. Kitila Mkumbo amefanya ziara ya kikazi katika jimbo la Ubungo kukagua miradi mbalimbali pamoja na changamoto kadhaa zinazowakabili wananchi wa jimbo hilo ili kuweka mikakati ya kizitatua na kusukuma mbele maendeleo

Awali akikagua kivuko cha waenda kwa miguu (Daraja la Nyoka) katika mtaa wa Kanuni, Mkumbo amewasisitiza wananchi wa maeneo hayo kuendeleza utamaduni wa kusafisha mito ili kupunguza adha ya mafuriko hasa kwa kipindi hiki cha mvua na yeye kama Mbunge ameahidi kukabidhi vifaa vya kufanyia usafi kwa wananchi wa maeneo hayo

Katika miradi mingine iliyotembelewa, Prof. Mkumbo amewaahidi ushirikiano wa kutosha wananchi katika kuhakikisha miradi hiyo ya ujenzi inayoendelea inakamilika kwa wakati ili kurahisisha ugatuaji wa huduma kwa wananchi na yeye kama Mbunge atashiriki kikamilifu kwenye michango ya hali na mali ili miradi hiyo ikamilike

"Miradi hii ni muhimu kukamilika ili itusaidie kutoa huduma kwa wananchi, tuhakikishe tunaisimamia kwa uadilifu ili tija yake ionekane. Na pia Halmashauri iendelee kutenga fedha za kutosha kwenye utekelezaji wa miradi hii" alisema Mkumbo

Miradi mingine iliyotembelewa leo ni pamoja na mradi wa ujenzi wa ofisi ya serikali ya mtaa wa Kanuni, ujenzi wa jengo la utawala shule ya msingi Amani, kituo kipya cha daladala cha Mabibo Mwisho, Kivuko cha Gonzaga, kivuko cha Sahara, pamoja na kukutana na wahanga wa Mafuriko katika mtaa wa Azimio ambapo ameahidi kuwasaidia baada ya tathmini yao kukamilika