MKURUGENZI UBUNGO AKAGUA MIRADI YA BOOST

Posted on: August 13th, 2023

Mkurugenzi wa Manispaa ya Ubungo Ndg. Elias Ntiruhungwa  tarehe 13/08/2023 ametembelea na kukagua utekelezaji wa mradi wa BOOST unaotekelezwa ndani ya Shule nane za Msingi za Manispaa hiyo.

Katika ziara hiyo Ntiruhungwa amefanikiwa kutembelea Shule ya msingi Mbezi, Makabe, Msumi, Tegeta A, Matosa, Makoka na Millenia ya tatu ambapo madarasa, madawati na matundu ya vyoo yanajengwa katika Shule hizo kwa gharama ya shilingi 1,509,400,000 ambazo ni fedha za BOOST kutoka Serikali kuu.

Manispaa ya Ubungo kupitia mradi huo imefanikiwa kupata Shule mbili mpya zenye mikondo miwili, vyumba 21 vya madarasa katika Shule tano za Msingi, vyumba viwili vya mfano vya elimu ya awali katika Shule 1 ya Msingi na ujenzi wa matundu 20 ya vyoo katika Shule nne za Msingi.

Akiongea katika ukaguzi huo Ntiruhungwa amewapongeza walimu wakuu waliomaliza ujenzi huo kwa ubora na amewaagiza wasiomaliza kusimamia vyema na kumaliza ujenzi wa mradi huo ndani ya muda uliopangwa na hivyo kupata majengo na madawati yenye ubora kwa maslahi ya wanaubungo na Taifa kwa ujumla. 

Aidha, Ntiruhungwa amemshukuru Mhe. Rais Dkt. Samia Suluhu Hassan kwa mgao wa fedha hizo ambazo zimesaidia kuboresha miundombinu ya elimu kwa kuongeza vyumba vya madarasa, madawati na matundu ya vyoo katika Shule mbalimbali za Msingi zilizopo ndani ya Manispaa hiyo.

Kwa upande wake Mwalimu Mkuu wa Shule ya Msingi Msumi Noelina Tendwa amesema atahakikisha miundombinu hiyo ya elimu inatunzwa na kusimamiwa vyema ili itumike kizazi na kizazi na ameishukuru Manispaa hiyo kwa kupeleka mradi huo Shuleni hapo ambao kwa kiasi kikubwa umepunguza changamoto ya upungufu wa madarasa na vyoo shuleni hapo.

Mradi wa BOOST utaboresha upatikanaji wa fursa sawa katika ujifunzaji bora wa elimu ya awali na Msingi Tanzania Bara, ambao ni sehemu ya Mpango wa lipa kulingana na matokeo katika elimu awamu ya pili (EPforR II) na unaochangia utekelezaji wa Mpango wa Maendeleo wa Sekta ya Elimu wa miaka mitano 2021/2022 hadi 2025/2026.