MPANGO WA AWALI WA BAJETI YA LISHE 2024/2025 WAFANYIKA

Posted on: November 24th, 2023

Manispaa ya Ubungo kupitia idara  ya Afya, ustawi wa jamii na lishe imefanya kikao kazi kilicholenga kufanya utekelezaji wa  mpango wa awali wa huduma za lishe mtambuka kwa mwaka wa fedha 2024/2025.

Akiongea katika kikao hicho kilichofanyika  tarehe 24 novemba,2023 Afisa lishe Mkoa Bi. Mwanamvua Zuberi alisisitiza katika uandaaji wa mpango kazi huo ni muhimu kuzingatia vipaumbele ambavyo vitasaidia kuboresha maswala ya lishe na hasa utoaji wa elimu ya lishe mtambuka kwa jamii

Mwanamvua aliendelea kueleza kuwa, ni  muhimu mambo yote yanayotakiwa kuzingatiwa katika maswala ya lishe ambayo kwa miaka ya nyuma hayakufanyika kwa sasa  yakapewa kipaumbele na marekebisho yote yaliyofanyika katika kuweka maboresho ya mpango kazi ujao yakazingatiwa ili kupata mpango kazi utakaoleta tija kwa jamii.

Akiwasilisha taarifa ya mafanikio ya utekezaji wa  lishe kwa mwaka 2022/2023 na robo ya kwanza ya 2023/2024, Afisa lishe  wa Manispaa ya Ubungo Bi. Beatrice Mossile amesema kuwa, katika kuhakikisha lishe inakuwa ni swala mtambuka kitengo cha  lishe kimefanikiwa kuwafikia wananchi kwa ukaribu zaidi kwa kutoa elimu na pia kuhakikisha ushirikishaji wa  viongozi wa Serikali katika siku ya afya na lishe  katika ngazi ya mitaa na kata ( SALiKi) umefanyika.

Aliendelea kueleza kuwa, Mafunzo ya matibabu ya utapia mlo yanaendelea kutolewa kwa watoa huduma za afya na pia Utoaji wa elimu ya lishe mashuleni, kuanzisha club za lishe mashuleni ambapo jumla ya shule 213 kati ya 262 zimeanzishwa. Uhitaji wa vibao vya kupimia urefu, chakula dawa na wadi ya watoto alielezea vinahitajika.

Katika utoaji wa elimu pia wadau mbalimbali wameweza  kushirikiana na Manispaa ya Ubungo kwaajili ya utoaji wa elimu ya lishe mashuleni na kwenye jamii, Pia kusaidia watoto waliokutwa na udumavu na  Wadau hao ni pamoja na MDH, NCT, TANCO na Jiephaego.

Aidha, Mikakati mbalimbali imewekwa katika mpango wa awali wa huduma mtambuka za lishe kutoka idara na vitengo ikiwemo Idara ya  Afya, ustawi wa jamii na lishe, vituo vya huduma za afya, idara za kilimo, uvuvi na mifugo, elimu msingi na sekondari, maendeleo ya jamii, TASAF na Mipango na uchumi