MRADI WA UBORESHAJI USALAMA WA MILKI ZA ARDHI WATAMBULISHWA UBUNGO

Posted on: September 6th, 2023

Wizara ya Ardhi Nyumba na Maendeleo ya Makazi kupitia mradi wa Uboreshaji Usalama wa Milki za Ardhi (LTIP) inakusudia kupanga, kupima na kusajili hati za hakimiliki 28,000 mkoa wa Daressalaam

Hayo yameelezwa na Bi. Aisha Masanja mwezeshaji kutoka Wizara  hiyo  septemba 06, 2023  wakati akitambulisha mradi huo kwa timu ya menejimenti ya Manispaa hiyo

Masanja amesema kuwa kwa Manispaa ya Ubungo mradi utaanza kutekelezwa katika Mitaa mitano ukiwemo Mtaa wa Saranga, Mbezi Louis, Stopover, Kimara B na Kibwehele ambapo jumla ya hati miliki 3,419 zitatolewa kwa wananchi wa Mitaa hiyo.

“Manispaa ya Ubungo ni miongoni mwa Halmashauri chache Nchini zilizobahatika kutekeleza  mradi huu wenye tija  kwa jamii  kwani unalenga kuboresha usalama wa milki za ardhi kwa kupanga, kupima na kusajili hati za hakimilki pamoja na kupunguza gharama za upimaji" alisema Masanja

Ili kuhakikisha wananchi wanapata hati kwa wakati, Masanja ameeleza kuwa  kupitia mradi huu wananchi watafikiwa katika Mitaa yao na kuhakikisha mazoezi yote ya urasimishaji yaliyokuwa yameanza kupitia makampuni yanafika mwisho kwa watu kupata hati zao.

Akiongea wakati wa kufunga kikao hicho, Mkurugenzi wa Manispaa ya Ubungo Ndg. Elias Ntiruhungwa ameishukuru Serikali  kwa mradi huo ambao unatoa fursa kwa wananchi kupimiwa na kumilikishwa maeneo yao kwa muda mfupi jambo ambalo ni kiu ya  muda mrefu ya wananchi.

Aidha, Ntiruhungwa ameeleza kuwa upimaji na umilikishaji ardhi ni chanzo kikubwa cha mapato kwa Serikali hivyo ni mategemeo yake baada ya mradi huu kuisha maeneo yanayopitiwa na mradi yataanza kulipa kodi ya ardhi na hivyo kukuza uchumi wa Nchi.