NAIBU WAZIRI WA MAJI ATEMBELEA MIRADI YA MAJI - UBUNGO

Posted on: August 20th, 2023

Naibu Waziri wa Maji Mhe. Eng. Maryprisca Mahundi leo Agosti 20, 2023 ametembelea miradi ya Maji iliyopo Manispaa ya Ubungo, miradi hiyo iliyotembelewa ni pamoja na Tanki la Maji lililopo mtaa wa Mshikamano kata ya Mbezi lenye ujazo wa lita milioni sita na kituo cha kusukuma maji kilichopo Mbezi inn.

Katika ziara hiyo Naibu waziri Mahundi amepokelewa na Mkuu wa Wilaya hiyo Mhe. Hashim Komba, akimpokea naibu waziri huyo Mhe. Komba amepongeza jitihada zinazofanywa na wizara katika kutatua kero za maji kwa wananchi. Moja ya maeneo hayo ni Tanki la maji la Mshikamano ambalo ni kwaajili ya maeneo kama Mbezi, Mshikamano, Msakuzi, Machimbo, Makabe, Luguruni na Magari saba.

Mkuu wa Wilaya hiyo Mhe. Komba amemuomba Naibu Waziri kuwa juhudi za Wizara zinazofanywa kwenye miradi ya maji ziende sambamba na ujenzi wa mifumo ya maji taka. Mhe. Komba amesema "Spidi ya miradi ya maji iende sambamba na ujenzi wa mifumo ya majitaka". Alizungumzia eneo kama Sinza kiujumla na Hospitali ya Sinza, eneo hili linaitaji sana mifumo ya majitaka.

Nae Kaimu Mtendaji Mkuu wa DAWASA Mhandisi Shabani Mkwanywe amesema jitihada zinaendelea kufanyika kutatua kero za maji, aliongeza kuwa kwa eneo hilo ni asilimia 40 tu ndiyo imekamirika na bado jitihada zinaendelea ili tatizo la maji limalizike kabisa.

Wananchi wa maeneo hayo pia wamepongeza juhudi zinazofanywa na Serikali ya awamu ya sita katika kutatua kero za maji katika maeneo yao. Wameongeza kuwa japo kuna changamoto lakini wanaimani mambo yatakuwa mazuri kwa juhudi wanazoziona zikiendelea.

Mzee Hondohondo mkazi wa maeneo hayo aneshukuru kwa miradi hiyo mikubwa ya fedha nyingi lakini amesisitiza kuwa wananchi waungiwe maji kusiwe na danadana. Sambamba na hilo amegusia Shule ya Sekondari Makabe ipatiwe maji kwani ni Shule yenye wanafunzi  wengi lakini kuna tatizo la maji.

Katika ziara hiyo Naibu Waziri amewaomba wananchi wa maeneo hayo kutunza miundombinu hiyo inayofanywa na Serikali ya awamu ya sita ili idumu kizazi hadi kizazi. "Niwaombe sana wananchi, miundombinu hii itunzwe ili idumu kizazi hadi kizazi".