RC CHALAMILA AIPONGEZA UBUNGO KWA USIMAMIZI MZURI WA MIRADI

Posted on: February 23rd, 2024

Mkuu wa Mkoa wa Dar es salaam Mhe. Albert Chalamila ameipongeza Manispaa ya Ubungo kwa kusimamia utekelezaji wa miradi mbalimbali ya maendeleo ndani ya Manispaa hiyo.

Pongezi hizo amezitoa leo wakati akizindua Shule mpya ya Msingi iitwayo Goba Mpakani iliyopo Kata ya Goba ndani ya Manispaa hiyo ambayo imeshaanza kutumika ikiwa na idadi ya wanafunzi 1,260 kati yao 604 ni wasichana huku wavulana wakiwa ni 656.

Mhe. Chalamila amewataka walimu wa Shule hiyo kuongeza jitihada za ufundishaji na kutochangisha michango isiyo na tija ambayo inaleta kero kwa wananchi.

Kwa upande wake Mwalimu Mkuu wa Shule hiyo Mwl. Mhana amesema ujenzi wa Shule hiyo umegharimu Shilingi Milioni 597.8 kati ya hizo shilingi Milioni 475.3 ni fedha zilizotokana na mradi wa Boost wa lipa kulingana na matokeo huku kiasi cha shilingi Milioni 122.5 ni fedha za mapato ya ndani ya Manispaa hiyo.

Mwl. Mhana ameendelea kueleza kuwa fedha hizo zimeweza kujenga madarasa mawili ya wanafunzi wa awali, madarasa 14 ya wanafunzi wa elimu msingi, matundu 6 ya vyoo vya wanafunzi wa awali na matundu 18 ya wanafunzi elimu ya Msingi, jengo 1 la utawala, kichomea taka, matundu mawili ya vyoo vya walimu, na bembea za wanafunzi wa awali pamoja na kuweka  madawati ndani ya madarasa hayo.

Kwa upande wake Diwani wa Kata hiyo Mhe. Esther Ndoha amesema uwepo wa Shule hiyo umewezesha kupunguza adha kwa watoto ambapo hapo awali watoto walikuwa wanatumia umbali mrefu kupata elimu.

Akiwa katika Wilaya hiyo Mhe. Albert Chalamila amekagua ujenzi wa barabara ya kutoka Kibamba kwenda Mpiji Magoe yenye ukubwa wa kilomita 10 inayojengwa kwa kiwango cha lami na kukamilika kwa ujenzi wa barabara hiyo kutarahisha hali ya usafiri na usafirishaji kwa wananchi wa maeneo hayo.