RC CHALAMILA ASIKILIZA NA KUTATUA KERO ZA WANANCHI WA JIMBO LA KIBAMBA

Posted on: April 9th, 2025

Mkuu wa Mkoa wa Dar es Salaam Mhe. Albert Chalamila  April 9, 2025 amefanya mkutano wa hadhara katika kata ya Saranga Jimbo la Kibamba wenye lengo la kusikiliza na kutatua kero za wananchi wa jimbo hilo ambapo ameahidi kuzipatia ufumbuzi kero mbalimbali zinazowakabili wananchi hao.

Akisikiliza kero za wananchi wa Kata ya Saranga, RC Chalamila amepokea changamoto mbalimbali zikiwemo za kutokamilika kwa Zahanati, Changamoto za Elimu, Miundombinu ya barabara, Maji, Umeme, Afya, migogoro mbalimbali ya Ardhi na changamoto za Kisheria ambazo amewataka watendaji kuhakikisha wanazishughulikia Mara moja.

Akijibu hoja ya kutokamilika kwa zahanati. Chalamila amemwagiza Mkurugenzi wa Manispaa ya Ubungu Aron Kagurumujuli  kuwa ifikapo Ijumaa wiki ijayo  ahakikishe jumla ya shilingi Milioni 100 zinapelekwa kwa ajili ya  ujenzi wa zahanati katika kata hiyo ili ujenzi uweze kuanza na kukamilika.

Akijibu kuhusu changamoto ya barabara Chalamila amesema jumla ya barabara 3 zimeingizwa katika Mradi wa World bank na kati ya barabara hizo mojawapo ni ujenzi wa  barabara ya Saranga na  Ukombozi ambapo pamoja na mambo mengine amewaeleza wananchi kuwa Serikali inaendelea kujiridhisha katika mambo mbalimbali ya kifedha na kisheria ili ujenzi uanze ikiwemo fidia kwa wananchi ambao nyumba zao zitapitiwa na mradi huo wa barabara.

Katika hatua nyingine, Chalamila amesema Serikali imejenga tanki la maji linaloenda kusukuma maji  katika kata hiyo huku akiwataka wananchi kuwa na uvumilivu pale ambapo Serikali inapambana kutatua changamoto zinazowakabili.

Amesema mradi huo wa tanki la kusukuma maji Kibamba umejengwa kwa gharama ya shilingi bilioni 36.8 na tanki hilo linasaidia wakazi wa jimbo la Kibamba, Segerea, na wilaya ya Kinondoni kupata maji.

Katika ziara hiyo, Mh. Chalamila ameweke jiwe la msingi katika Mradi wa zahanati ya Mpiji Magohe unaojengwa  kwa gharama ya shilingi 615,000,000 mpaka kukamilika kwake na zahanati huku zahanati hiyo ikihudumia wananchi wapatao 108,466 ambapo ujenzi wake mpaka sasa umefikia asilimia 85.