SERIKALI KUJA NA MPANGO WA DHARURA NA HARAKA KUTATUA CHANGAMOTO YA USAFIRI WA MWENDOKASI

Posted on: October 1st, 2025

Kufuatia changamoto kubwa ya usafiri wa mwendokasi ambayo inaendelea hivi sasa katika barabara ya Morogoro kuanzia Kituo cha Kimara Mwisho mpaka Gerezani, serikali imeamua kuja na mkakati maalumu wa kutatua changamoto hiyo kwa kuongeza idadi ya mabasi ya ziada katika kipindi hiki cha kusubiri mabasi ya njia hiyo yafike nchini

Hayo yamesemwa alfajiri ya  Oktoba 01, 2025 na mkuu wa Mkoa wa Dar es Salaam Mhe. Albert Chalamila alipofanya ziara katika Kituo cha mwendokasi cha Kimara Mwisho na kujionea adha kubwa wanayopata wananchi wanaotumia usafiri huo

Chalamila ameeleza kuwa, kwa kipindi sasa usafiri huo umekuwa na changamoto ambayo inasababishwa na uchache wa mabasi hayo ambayo kwasasa yanayofanya kazi hayazidi mabasi 40 Hali inayopelekea wananchi kusubiri kwa muda mrefu vituoni

Tayari serikali ya Jamhuri ya Muungano wa Tanzania chini ya Rais Dkt. Samia Suluhu Hassan ilishafanya maamuzi ya kuongeza mwekezaji mtoa huduma katika usafiri wa mwendokasi ambapo mabasi mapya yatakayotumika katika njia ya morogoro yanatarajiwa kufika nchini hivi karibuni

Hata hivyo, Chalamila ameeleza kuwa wakati wowote kuanzia kesho oktoba 02, 2025 serikali itachukua mabasi kadhaa kutoka kampuni ya MOFAT kutoka barabara ya Mbagala, ili kusaidia kutatua changamoto ya usafiri kwa barabara ya Morogoro ambayo imezidiwa huku tukiendelea kusubiri mabasi mengine kufika nchini

"Kwanza niwaombe radhi ndugu wananchi kwa changamoto mnazopitia katika usafiri huu. Serikali inaona na inafanyika kazi kwa haraka ili kumaliza changamoto hii kwa wakati. Naomba sana muwe watulivu na wavumilivu katika kipindi hiki cha kadhia hii" alisema Chalamila

Wakitoa maoni yao wananchi wameeleza kuwa, wanaomba daladala za kawaida ziruhusiwe kupita katika njia ya mwendokasi ili kutatua changamoto hiyo kwa muda mfupi wakati suluhisho la kudumu linafanyiwa kazi, maoni ambayo RC Chalamila ameahidi kuyachukua na kwenda kuyafanyia kazi haraka kutoka sasa kwa kukaa na wadau wa sekta ya usafirishaji wakiwemo LATRA, UDART na jeshi la polisi