TAASISI KUTOKA KOREA KUSINI YATEMBELEA UBUNGO

Posted on: November 7th, 2023

Taasisi ya Geris ya Korea Kusini leo tarehe 07/11/2023 imeitembelea Shule ya Msingi Tegata A iliyopo Kata ya Goba ndani ya Manispaa ya Ubungo kwa lengo la kujionea maendeleo ya Shule hiyo kitehama kutokana na msaada ilioutoa hapo awali wa vifaa vya TEHAMA pamoja na kusafirisha walimu wa Shule hiyo Nchini Korea Kusini kwa ajili ya kujifunza masuala ya TEHAMA.

Sambamba na lengo hilo ugeni huo umelenga kubadilishana uzoefu baina ya walimu na wanafunzi wa Taasisi hiyo huku michezo mbalimbali ilichezwa na wanafunzi hao ikiwemo kurusha roketi, kuimba na kucheza ngoma za asili kwa wageni hao katika hafla ndogo iliyoandaliwa na Manispaa hiyo ya kupokea wageni hao.

Taasisi hiyo yenye mradi wa KLIC “Korea Learning International Cooperation” inayojishughulisha na ufundishaji wa masuala ya TEHAMA sambamba na kugawa vifaa vya TEHAMA Duniani huku ikisimamiwa na Serikali ya Nchi ya Korea Kusini imeambatana na Gavana wa Jimbo la Guangzhou Nchini humo Ndg. Lee Jeong Seon pamoja na baadhi ya wanafunzi na walimu wa TEHAMA wa Taasisi hiyo.

Kutembelewa huko kumetokana na Msaada wa kupatiwa Vifaa mbalimbali vya TEHAMA ambavyo hapo awali Shule hiyo ilikabidhiwa na taasisi hiyo sambamba na kusafirishwa kwa walimu 6 wa TEHAMA wa Shule hiyo Nchini Korea kwa lengo la kwenda kujifunza masuala ya TEHAMA.

Akiongea katika hafla ndogo iliyofanyika katika Shule hiyo ya kupokea wageni hao Kaimu Mkurugenzi wa Manispaa hiyo Ndg. Denis Nyoni ametoa shukrani kwa Taasisi hiyo kwa kuchagua Manispaa hiyo kwa ajili ya msaadaa huo ambao utachochea ari ya ujifunzaji na ufundishaji wa masuala ya TEHAMA kwa wanafunzi.

“Tukiwa katika suala la ukuaji wa teknolojia vifaa mlivyotupatia kwa kiasi kikubwa vimekuwa ni msaada mkubwa wa kuwezesha wanafunzi kujifunza masuala ya TEHAMA kwa vitendo na kuongeza uelewa kwa wanafunzi hao”

Aidha, Nyoni ametoa wito kwa Taasisi zingine kuendelea kutoa misaada ya namna hiyo katika Shule mbalimbali za Manispaa hiyo ili kuwezesha wanafunzi kuendana na kasi ya teknolojia kwa maslahi yao na Taifa kwa ujumla.