TATHMINI YA ZIARA YA KATA KWA KATA YAFANYIKA KWA KIPEKEE | MIRADI 34 ILIYOKAGULIWA YATOLEWA TATHMINI YAKE | UWAJIBIKAJI WA WATUMISHI WA UMMA WASISITIZWA

Posted on: September 2nd, 2023

Katika ule utamaduni wake wa Uongozi wa pamoja "One Line Approach" wa mkuu wa wilaya ya Ubungo Mhe. Hashim Komba, leo Septemba 02, 2023 ameongoza kikao maalumu cha tathmini ya ziara yake ya kata kwa kata ambayo ilifanyika kuanzia Julai 11 mpaka Agosti 14, 2023 Katika kata zote 14 za Halmashauri ya Manispaa ya Ubungo

Katika ziara hiyo jumla ya mikutano 14 ilifanyika, Miradi 34 ilikaguliwa na kero za wananchi 220 zilisikilizwa na kutatuliwa katika kata zote 14. Hivyo kikao cha leo kimekuja maalumu kwaajili ya kutathmini ziara hiyo na kupata mrejesho wa maelekezo yaliyotolewa kwenye miradi mbalimbali ya maendeleo na utatuzi wa kero za wananchi

Akiongea katika kikao hicho Mhe. Komba amemshukuru mkurugenzi wa Manispaa ya Ubungo, wakuu wa idara na watumishi wote kwa ushirikiano wao wa dhati walioutoa katika kipindi chote cha ziara hiyo. Aidha, DC Komba ametoa maelekezo kwa miradi yote ambayo haijakamilika, ikamilishwe haraka kutoka sasa ili kugatua huduma kwa wananchi

"Watumishi wenzangu ni muhimu kuzingatia maadili ya utumishi wetu ikiwa ni pamoja na kuwa wawajibikaji kwenye usimamizi wa miradi ya maendeleo. Na pia ninatoa onyo kwa watendaji wa mitaa ambao bado hawawajibiki kwenye majukumu yao ya kila siku, na onyo hili ni la mwisho kwenu" alisema Komba

Nae mkurugenzi wa Halmashauri ya Manispaa ya Ubungo Ndg, Elias Ntiruhungwa amempongeza DC Komba kwa ziara hiyo ambayo imesaidia kuongeza kasi ya ukamilishaji wa miradi na pia ameahidi kuendelea kusimamia miradi ya Manispaa kwa ukaribu zaidi ili malengo ya serikali ya Rais Dkt. Samia Suluhu Hassan yatimie kwa vitendo

Akitoa shukrani kwa niaba ya baraza la madiwani Mstahiki Meya wa Manispaa ya Ubungo Mhe. Jaffery Nyaigesha amempongeza mkuu wa wilaya kwa ziara hiyo na ametoa rai ya kuwepo kwa ziara hizo mara kwa mara ili kuongeza ari ya usimamiaji na ufuatiliaji wa miradi ya maendeleo

Mwisho, DC Komba ametoa vyeti vya pongezi kwa baadhi ya watumishi kwa ushiriki mzuri katika ziara hiyo kwa niaba ya watumishi wengine wa Wilaya na Manispaa ya Ubungo

pichani ni Afisa habari Manispaa ya Ubungo ndg. Mustapha Mwakibete akipokea cheti cha pongezi