TIMU YA NETBALL UBUNGO YAINGIA 16 BORA, YAWA KINARA KWENYE MAKUNDI.

Posted on: October 23rd, 2023

Katika mashindano ya Shirikisho la Michezo Serikali za Mitaa Tanzania ‘SHIMISEMITA’ yanayoendelea Mkoani Dodoma timu ya netball ya Manispaa ya Ubungo imefanikiwa kupita kwenye makundi na kuwa wa kwanza kwenye kundi na hivyo kufanikiwa kuingia 16 bora.

Timu hiyo imefanikiwa kupita kwenye makundi na kuwa mshindi wa kwanza na hivyo kufanikiwa kuingia kumi na sita bora, na tarehe 23/10/2023 imefanikiwa kushinda goli 21 - 9 dhidi ya timu ya Wilaya ya Ifakara katika viwanja vya Jamhuri Mkoani Dodoma.

Akiongea Afisa Michezo wa Manispaa hiyo Wikansia Mwanga baada ya ushindi huo ameipongeza timu hiyo na kuwashukuru Viongozi wa Manispaa hiyo akiwemo Mkuu wa Wilaya, Katibu Tawala na Mkurugenzi wa Manispaa hiyo kwa kuendelea kuwaunga mkono wakati wote wa mashindano hayo.

“Kiukweli tumefurahi sana kutembelewa na Viongozi wetu hii inaongeza ari kwa wachezaji kuendelea kufanya vizuri katika mashindano haya” Alisema Mwanga.

Kwa upande wake Kocha wa timu hiyo Sweetbert Magoti amesema timu hiyo imetoka kinara kwenye kundi lake na sasa inajipanga kwa ajili ya kumi na sita bora ambapo timu itacheza na mabingwa wenzao waliongia kumi na sita bora kutoka kwenye makundi mengine.

“Timu yetu imejipanga kushinda kila mechi na kurudi na kombe Ubungo kila meche kwetu ni fainali tumejipanga vya kutosha timu ina morali na hakuna majeruhi hata mmoja tumejipanga kisawa sawa hakika Ubingwa utarudi kwetu Ubungo” alisema Magoti.

Nae Kapteni wa timu hiyo Shinuna Mohamed ameeleza kuwa timu hiyo ipo tayari na itafanikiwa kupita kumi na sita bora na kucheza robo fainali, nusu fainali hadi fainali na kuibuka vinara katika mashindano hayo.