TIMU YA UFUATILIAJI NA TATHMINI YA MIRADI MBALIMBALI YAFANYA ZIARA KUKAGUA MIRADI YA MAENDELEO

Posted on: August 21st, 2025

Timu ya Ufuatiliaji na Tathmini ya Miradi ya Maendeleo ya Halmashauri ya Manispaa ya Ubungo, ikiongozwa na Afisa Mwandamizi wa Ufuatiliaji na Tathmini, Bw. George Maiga,  August 21,2025  imefanya ziara ya kikazi katika miradi mbalimbali ya maendeleo inayotekelezwa ndani ya manispaa, kwa lengo la kujiridhisha na kasi pamoja na ubora wa utekelezaji wake.

Ziara hiyo ilianza katika vituo vya kutolea huduma za afya, ikiwemo Kituo cha Afya Amani, Kituo cha Afya Mpiji Magohe, pamoja na Zahanati ya Msakuzi. Katika vituo hivyo, timu ilikagua maendeleo ya ujenzi wa vyumba vya upasuaji, wodi za akinamama pamoja na ofisi za watumishi wa afya. 

Kwa mujibu wa taarifa ya mafanikio iliyowasilishwa na wasimamizi wa miradi hiyo, kazi zipo katika hatua za mwisho za ujenzi.

Akizungumza baada ya kukagua miradi hiyo, Bw. Maiga aliwapongeza wakandarasi kwa kasi ya utekelezaji, huku akisisitiza umuhimu wa kuzingatia viwango vya ubora vinavyotakiwa na serikali. 

Alisema, "Hii ni miradi inayogusa maisha ya watu moja kwa moja, hivyo tunahitaji kuona thamani ya fedha za umma kwa kuhakikisha ujenzi unakamilika kwa ubora wa hali ya juu."

Naye Mganga Mfawidhi wa Kituo cha Afya Mpiji Magohe, Dkt. Hereswida Rimoy, alisema mradi huo ni wa muhimu mno kwa ustawi wa huduma za afya, hususan kwa akinamama na watoto.

 “Mradi huu utaleta mapinduzi makubwa katika utoaji wa huduma. Tunaishukuru serikali ya awamu ya sita kwa kuendelea kutujali sisi wananchi kupitia uwekezaji huu muhimu,” alisema Dkt. Rimoy.

Katika hatua nyingine ya ziara hiyo, timu ilitembelea shule mbalimbali zikiwemo Shule ya Sekondari Luguruni, Shule ya Msingi Idrisa Abdul Wakil, Shule ya Msingi na Sekondari Kulangwa, pamoja na Shule ya Msingi Kibamba. 

Miradi iliyokaguliwa ni pamoja na ujenzi wa madarasa, bweni moja la wanafunzi wenye mahitaji maalum, na ukuta wa shule kwa ajili ya usalama wa mazingira ya wanafunzi.

Mwalimu Mkuu wa Shule ya Msingi Kibamba, Mwl. Juliano Pima, alieleza kuwa kukamilika kwa bweni hilo kutakuwa mkombozi mkubwa kwa wanafunzi wenye ulemavu wanaotoka mbali.