UBUNGO HALI NI SHWARI NA SERIKALI IPO TAYARI MUDA WOTE KUDHIBITI UHALIFU

Posted on: September 15th, 2022

Ulinzi na usalama wa Raia na mali zao ndo ajenda namba moja kwa Wilaya ya Ubungo na tayari vyombo vya ulinzi na usalama vinaendelea  kudhibiti na kuimarisha hali ya usalama kwa maeneo yote ya Wilaya ya Ubungo

Hayo yamezungumzwa leo Septemba 15, 2022 na Mkuu wa Wilaya ya Ubungo Mhe. Kheri James katika kikao kazi kilichojumuisha Wenyeviti Mitaa, Watendaji wa Kata na na Mitaa wa Wilaya hiyo lengo ikiwa ni kuongelea ajenda ya Ulinzi na Usalama juu ya udhibiti wa uhalifu pamoja na suala la unyanyasaji wa kijinsia.

Kheri ameendelea kueleza kuwa  kumeibuka vitendo vya uhalifu vinavyofanywa na vikundi vya vijana wadogo maarufu kama ‘panya road’ katika mitaa mbalimbali ya Jiji la Dar es Salaam ambapo amesema kwa upande wa Wilaya ya Ubungo hali ni shwari na hakujaripotiwa taarifa yoyote ya vitendo vya uhalifu na uvunjifu wa amani.

Aidha, Kheri ameeleza yoyote ambaye atabainika kuhusika na uhalifu kwa namna yoyote, ameagiza jeshi la polisi kukamata watu hao na kuwafikisha mahakamani kwa hatua za kisheria.

“Tukiendelea kudekeza wahalifu katika mitaa yetu Nchi itaingia matatizoni. Muhalifu akikamatwa apelekwe mahakamani haraka  ili akahukumiwe na vyombo vyetu vya kutoa maamuzi kwa mujibu wa Sheria” Alisema James.

Naye Mwenyekiti wa Mtaa wa Mpigi Magoe ndugu Said Seleman Diuchile ameeleza kuwa wao kama viongozi wapo tayari kutoa ushirikiano kwa jeshi la polisi juu ya utoaji taarifa za wahalifu sugu kwenye mitaa yao ili kusaidia Wananchi kuwa salama katika shughuli zao za kila siku.

Vilevile kwa upande mwingine Kamanda wa Polisi wa Wilaya ya kipolisi Kimara SP Leah Ncheyeti ametoa taarifa ya kukithiri kwa vitendo vya ukatili na unyanyasaji wa kijinsia kwenye maeneo mbalimbali ya Wilaya hiyo ambapo wanawake na watoto wamekua wakikumbana na vitendo hivyo kwa kiasi kikubwa.

SP Leah ameendelea kueleza kuwa vitendo hivyo vimekithiri kutokana na watu wengi kunyamazia vitendo hivyo vinapotokea katika ngazi ya familia hali inayopelekea kupoteza ushahidi muhimu wa kuwafikisha watuhumiwa kwenye vyombo vya sheria

#ubungoyetufahariyetu

#UbungoYaKibingwa