UBUNGO IMEWEKA MIKAKATI YA KUKUSANYA MAREJESHO YA MIKOPO YA 10%

Posted on: March 25th, 2022

Leo Machi 25, 2022 Idara ya Maendeleo ya Jamii Manispaa ya Ubungo imekutana na Afisa Utumishi Mkuu wa Manispaa hiyo Selemani Kateti lengo ikiwa ni kujadili na kuweka mikakati ya kufuatilia na kupata marejesho ya mikopo isiyo na riba iliyotolewa kwa vikundi vya wajasiriamali vya wanawake, vijana na watu wenye ulemavu pamoja na kuwasilisha taarifa za hali ya mikopo hiyo kwa kila Kata.

Kwa kipindi cha kuanzia mwaka wa fedha 2017/2018 hadi 2021/2022 Halmashauri imetoa fedha kiasi cha Tsh Bilioni 6.7 kwa ajili ya mikopo hiyo na ambapo kufikia Machi mwaka huu  Tsh Bilioni 1.97 zimerejeshwa huku  Tsh Bilioni 4.79 zikiwa bado hazijarejeshwa.

Akitoa ufafanuzi wa fedha ambazo hazijarejeshwa, Kaimu Mkuu wa Idara ya  maendeleo ya jamii katika Manispaa hiyo Mercy Ndekeno amesema kuwa  kiasi cha shilingi Bilioni 2.1 kinadaiwa na wadaiwa sugu wa mikopo hiyo ambao walipaswa kuwa wamemaliza kurejesha.

Pamoja na kufanya ufuatiliaji wa karibu, Idara pia imeazimia kuendelea kuchukua hatua Kwa  wanavikundi wanaokaidi kurejesha mikopo hiyo kama sheria inavyoelekeza. Kufanya vikao mara kwa mara vya kujadili utekelezaji wa zoezi hilo kwa kushirikiana  na watendaji wa Kata na Mitaa.

Akiongea katika kikao hicho Afisa utumishi Mkuu wa Manispaa hiyo amewataka watumishi wa idara hiyo kufanya kazi kwa  kufuata sheria, kanuni, taratibu na miongozo katika kutimiza majukumu yao.

 Pia, Kateti amewasisitiza maafisa hao kushirikiana vyema na vingozi wote wa Kata na Mitaa ili kuongeza ufanisi katika kupata marejesho ya mikopo hiyo. Na kuvitembelea vikundi vya kata kila mara.

Kateti ameendelea kwa kuwapongeza watumishi hao kwa jinsi wanavyopambana kuhakikisha marejesho hayo yanatolewa hadi kufikia Tsh Bilioni 1.9 na kuwataka waendelee kuongeza juhudi katika kuhakikisha fedha hizo zote zinarejeshwa na kusimamia mikakati iliyowekwa pamoja na kutumia ubunifu wakuwezesha fedha hizo ziweze kurejeshwa ipaswavyo.

Pamoja na hayo Kateti amewataka walezi wanaosimamia Kata kutuma taarifa kila siku juu ya mikopo hiyo kuanzia saa 12 hadi saa 02 usiku lengo ikiwa ni ufuatiliaji wa karibu wa kujua namna vikundi hivyo vinarejesha mikopo hiyo.