UBUNGO NA MAKUSANYO YA BILIONI 41 KWA MWAKA 2024/2025

Posted on: February 12th, 2024

Kwa mwaka wa fedha 2024/25 Manispaa ya Ubungo inatarajia kukusanya na kupokea fedha kiasi cha shilingi bilioni 134.8 kati ya fedha hizo shilingi bilioni 93 ni ruzuku kutoka serikali kuu na shilingi bilioni 41 ni fedha za makusanyo ya ndani ya Halmashauri

Hayo yamesemwa na mkuu wa idara ya uchumi na mipango manispaa ya Ubungo Andambike Kyomo wakati akiwasilisha rasimu ya mpango na bajeti kwa mwaka wa fedha 2024/25 kwa baraza maalumu la madiwani kwaajili ya kujadili na kupitisha mpango huo wa bajeti

"Katika kipaumbele cha kuongeza mapato, manispaa ya Ubungo imepanga kubuni, kusimamia na kuimarisha ukusanyaji wa vyanzo vya mapato ya ndani" alisema Kyomo

Akiongea katika baraza hilo mkurugenzi wa Manispaa ya Ubungo Elias Ntiruhungwa amewataka madiwani kuwa wavumilivu na kuamini mpango huo wa bajeti ambapo utekelezaji wake utasaidia kuongeza mapato kwa manispaa hali itakayopelekea  kuongeza uwezo wa utoaji wa huduma za jamii kwa wananchi

Aidha rasimu ya mpango huo wa bajeti imejikita katika vipengele vikuu vitano ikiwemo kuboresha makusanyo ya ndani, kuboresha huduma za kijamii katika sekta ya afya na elimu, kuboresha miundombinu ya barabara, kuimarisha utawala bora pamoja na kuimarisha usimamizi, ufuatiliaji na utoaji taarifa za utekelezaji wa shughuli za maendeleo.

Akichangia katika kikao hicho diwani wa kata ya Kimara Mhe. Ismail Mvungi ameipongeza Manispaa ya Ubungo kwa mpango huo mzuri wa bajeti, na amesisitiza usimamizi wa dhati wa mpango huo wa bajeti ili kupatikana kwa matokeo lengwa

Kwa upande wake mstahiki meya wa Manispaa ya Ubungo Mhe. Jaffery Nyaigesha amelipongeza baraza lake la madiwani kwa kuipitisha rasimu hiyo ya bajeti huku akiwataka kuendelea kuwasemea wananchi wa kata zao kwenye masuala mbalimbali ya maendeleo