UBUNGO TUMEFANIKIWA NA TUPO TAYARI KUWAPOKEA WANAFUNZI, DC KOMBA

Posted on: January 3rd, 2024

“Ili tuweze kufanikiwa kuwapokea wanafunzi wa awali, darasa la kwanza na kidato cha kwanza tunahitaji kuwa na miundombinu ya madarasa ya kutosha, matundu ya vyoo, viti na meza kwa Shule za Sekondari na madawati kwa Shule za Msingi sambamba na kuwakumbusha wazazi na walezi kuwaandaa wanafunzi kwenda Shule, na Wilaya ya Ubungo tumefanikiwa kwa hayo”

Kauli hiyo imetolewa na Mkuu wa Wilaya ya Ubungo Mhe. Hashim Komba leo tarehe 03/01/2024 alipokuwa kwenye ziara ya ukaguzi wa Shule za Msingi na Sekondari wilayani humo akiambatana na Kamati ya ulinzi ya Wilaya hiyo kwa lengo la kuona maandalizi ya mapokezi ya wanafunzi wa darasa la awali, la kwanza na kidato cha kwanza walioandikishwa kujiunga na masomo kwa mwaka 2024.

Wanafunzi walioandikishwa kuanza masomo ya Msingi na Awali ni 12,324 huku matarajio ilikuwa ni kuandikisha wanafunzi 47,190 na jumla ya wanafunzi 10,006 wanatarajiwa kujiunga kidato cha kwanza  kwa Shule za Msingi na Sekondari kwa mwaka wa masomo 2024.

Mhe. Komba ameendelea kueleza kuwa mafanikio ya miaka nane ya uwepo wa elimu bure wazazi na walezi wamekuwa na utayari wa kupeleka watoto Shule kwa ajili ya kupata elimu na katika kuhakikisha hilo linafanikiwa Wilaya ya Ubungo imefanikiwa kujenga Shule mpya sita kati ya hizo Shule tatu za Msingi na kufanya kuwa na jumla ya Shule za Msingi za Umma 69 huku Shule tatu mpya zikiwa ni Sekondari na kupelekea kuwa na idadi ya jumla ya Shule za Sekondari 36. 

Aidha, Mhe. Komba ameeleza kuwa Manispaa ya Ubungo ipo tayari kuwapokea wanafunzi wote walichaguliwa kujiunga na Shule za Wilaya hiyo kwani tayari kuna mazingira bora na rafiki ya kujifunzia na kufundishia kwa maana ya uwepo wa miundombinu bora ya elimu na walimu hivyo ametoa wito kwa wazazi na walezi kuwaandaa watoto kwa ajili ya kwenda Shule ifikapo Januari 08, 2024.

Kwa upande wake Mkurugenzi wa Manispaa ya Ubungo Elias Ntiruhungwa akimshukuru Rais Dkt. Samia Suluhu Hassan kwa ajili ya fedha za mradi wa uboreshaji wa elimu Msingi ‘Boost’ kiasi cha zaidi ya Shilingi Bilioni 1 na fedha za mradi wa uboreshaji wa elimu ya Sekondari kiasi cha zaidi ya shikingi Bilioni 5.