UBUNGO YA PILI KIMKOA MBIO ZA MWENGE 2023

Posted on: January 24th, 2024

Mkuu wa Wilaya ya Ubungo mhe. Hashimu Abdallah Komba amewashukuru Viongozi, Taasisi, NGOs Wananchi na  Wadau wote kwa ushirikiano walionyesha wakati wa mbio za  Mwenge wa uhuru 2023 ambapo wilaya hiyo imefanikiwa kushika nafasi ya pili kimkoa, ya 8 kikanda na nafasi ya 26 kitaifa. 

Mhe. Komba Ametangaza matokeo hayo leo Januari 17, 2024 katika mkutano wa tathmini ya mbio za Mwenge huo kwa mwaka 2023 ambapo wadau wote wameshiriki na ameeleza kuwa mafanikio hayo ni matokeo ya ushirikiano na uwajibikaji wa pamoja hivyo "nawapongeza na kuwashukuru sana"

Kutokana na matokeo hayo kuwa mazuri, Mhe. Komba ametoa barua na vyeti vya pongezi kwa waliofanikisha jukumu hilo la muhimu la kitaifa ikiwa ni njia ya kutambua mchango wao.

Aidha Mhe. Komba amewaeleza wajumbe kuwa mafanikio hayo ni chachu ya maandalizi mazuri ya mbio za mwenge wa uhuru 2024 ili kuwa mshindi wa kwanza au kutetea nafasi yake ya pili lakini sio kushuka.

DC Komba amesema "Mafanikio haya yana gharama kwa maana ya kuyalinda au kupanda zaidi, hivyo tujipange mapema kwa mwenge wa mwaka huu, tuibue miradi mapema ili nyaraka na vitu muhimu kulingana na vigezo vya mwenge viwekwe sawa" 

Kwa mwaka 2023 Wilaya ya Ubungo ilipokea mwenge wa uhuru Mei 26, 2023 ambapo ulikimbizwa kwa jumla ya kilomita 108.5, miradi 7 yenye thamani ya shilingi Bilioni 7.6 ilikaguliwa, kuwekewa mawe ya msingi na kutembelewa. Kwa mwaka 2024 Mwenge unatarajiwa kupokelewa mwezi mei baada ya kuwashwa rasmi katika mkoa wa kilimanjaro  mwezi aprili mwaka huu