UBUNGO YAADHIMISHA WIKI YA LISHE KITAIFA KWA ELIMU NA HUDUMA ZA LISHE KWA JAMII

Posted on: November 21st, 2025

Wiki ya Lishe Kitaifa imehitimishwa rasmi  Novemba 21, 2025 katika Wilaya ya Ubungo, hafla iliyofanyika katika Kituo cha Afya Kimara huku ikiambatana na elimu kwa umma, vipimo na ushauri wa kitaalamu kwa wananchi wa wilaya hiyo.

Akizungumza katika kilele cha maadhimisho hayo, Mganga Mkuu wa Manispaa ya Ubungo, Dkt. Aristides Rafael, amesema maadhimisho ya wiki ya lishe yamelenga kuelimisha jamii kuhusu umuhimu wa lishe bora kwa afya ya binadamu na kupunguza magonjwa yasiyoambukiza. 

“Lishe bora ni nguzo ya msingi katika kujenga jamii yenye afya na nguvu kazi imara. Tumejipanga kutoa elimu, vipimo na ushauri ili wananchi wafahamu namna ya kuandaa mlo kamili kwa gharama nafuu,” amesema Dkt. Rafael.

Aidha, Dkt. Rafael amesisitiza kuwa ni muhimu wananchi wakazingatia ulaji wa chakula chenye virutubisho vya kutosha ili kuepuka kutumia dawa kama chakula baadaye, kwani lishe bora ndiyo kinga ya kwanza dhidi ya magonjwa.

Kwa upande wake, Afisa Lishe wa Manispaa ya Ubungo, Bi. Beatrice Joseph Mossile, amesema wiki ya lishe imekuwa jukwaa muhimu kwa wataalamu kufikisha elimu ya lishe kwa makundi mbalimbali hususan watoto, wajawazito, wazee na watu wenye magonjwa sugu. 

“Ni muhimu kwa mama mjamzito kuzingatia lishe bora katika siku 1,000 za mwanzo tangu kutungwa kwa mimba hadi mtoto anapotimiza miaka miwili, kwani matatizo ya lishe katika kipindi hiki huathiri ukuaji wa mtoto na hayawezi kurekebishika kirahisi baadaye,” amesema.

Amewataka kina mama wajawazito kuhakikisha wanapata vyakula vya kutosha kutoka katika makundi yote muhimu ya chakula, akionya kuwa vifo vingi vya uzazi vinasababishwa na upungufu wa damu unaotokana na lishe duni.

Naye Mganga Mfawidhi wa Kituo cha Afya Kimara, Dkt. Malamla Chaulenzi, amesema kauli mbiu ya mwaka huu inayosema "Afya yako mtaji wako, zingatia unachokula" imekuja kwa wakati muafaka katika kipindi ambacho jamii inakumbwa na mabadiliko ya mtindo wa maisha. 

Baadhi ya wananchi waliopata huduma katika maadhimisho hayo wamepongeza hatua hiyo, wakisema imewasaidia kupata maarifa na kuelewa namna ya kuboresha lishe ndani ya familia zao