UBUNGO YAADHIMISHA WIKI YA UNYONYESHAJI MAZIWA YA MAMA DUNIANI, ZAHANATI YA GOBA

Posted on: August 5th, 2025

Ikiwa ni wiki ya maadhimisho ya unyonyeshaji maziwa ya mama duniani iliyoanza tarehe 1 agosti, 2025 hadi tarehe 7 agosti, 2025  inayoenda sambamba na kauli mbiu isemayo "Thamini unyonyeshaji, weka mazingira wezeshi kwa mama na mtoto" Ubungo imefanya maadhimisho hayo leo tarehe 5 agosti, 2025 katika zahanati ya Goba ambapo wakina mama wanaonyonyesha na wajawazito  wameaswa kuzingatia umuhimu wa kunyonyesha watoto kwani maziwa ya mama yana kinga muhimu  ya kumkinga mtoto dhidi ya magonjwa.

Akifungua maadhimisho hayo, Mganga Mkuu Manispaa ya Ubungo Dkt. Arstedius Raphael amesema kuwa , katika siku hii muhimu ya  wakina Mama wanaonyonyesha inapaswa kuhakikisha wanafata maelekezo yote yanayotolewa na wataalam yanayotaka kuzingatia masaa yasiyopungua 8 hadi 12 ambayo mtoto anatakiwa kunyonyweshwa kwa siku ili kumfanya mtoto akue akiwa na afya na kinga dhidi ya magonjwa

Dkt Raphael amesema kuwa, Mama anaponyonyesha pia  anajikinga na magonjwa mengi ikiwemo kansa ya maziwa n.k na pia umuhimu wa mama kunyonyesha ni kumkuza mtoto awe na afya njema pamoja na kumwezesha kukua vizuri kiakili.

Dkt. Raphael ametoa rai kwa familia kuzingatia malezi sahihi ya kuwasaidia wakina mamaa wanaonyonyesha na wajawazito  kwa kuwapa lishe nzuri ambayo itasaidia kuepukana na changamoto ya upungufu wa dawa na pia kwa mama anayenyonyesha kupata  maziwa mengi  na kumfanya awe na nguvu ya kunyonyesha

Aidha, Afisa lishe Manispaa ya Ubungo Beatrice Mossile amesema kuwa , utamaduni huu wa kutoa elimu kuhusu unyonyeshaji na elimu ya lishe kwa wa mama wanaonyonyesha imekuwa ikitolewa mara kwa mara na wataalam wa masuala ya lishe vituoni na wanatembelea ili kutoa elimu na kwa wajawazito

Na pia katika uzinduzi huo, wawezeshaji mbalimbali walitoa elimu kuhusu masuala ya ukatili wa kijinsia , elimu ya kupata bima inayosaidia kupata matibabu kwa urahisi bila ya gharama kubwa ICHF , elimu ya masuala ya lishe n.k

Sambamba maadhimisho hayo, yamefana kwa kuwafundisha wakina mama namna ya kutengeneza juisi inayowasaidia kuongeza damu na kuimarisha afya ya mama mjamazito kwa kumpa kinga mtoto akiwa tumboni.