UBUNGO YAFANYA MKUTANO NA WAFANYABIASHARA

Posted on: July 31st, 2022

Mkuu wa Wilaya ya Ubungo Mhe. Kheri James amewapongeza wafanyabiashara wa Wilaya ya Ubungo kwa kuwa chanzo cha kuboresha huduma kwa wananchi na kukuza uchumi wao kupitia kodi na tozo wanazolipa kwa Halmashauri.

Pongezi hizo amezitoa kwenye kikao kilichofamyika Julai 31, 2022 kati ya wafanyabiashara  na Serikali  kilicholenga  kujadili  na kutatua  changamoto zinazowakabili wafanyabiashara pamoja na kutoa elimu ya kukuza biashara zao.

Kikao hicho ambacho kinalenga pia kuboresha mahusiano kati ya Serikali na wafanyabiashara ni matokeo ya  Mbunge wa jimbo la Ubungo  Prof. Kitila Mkumbo baada ya kupokea kero kutoka kwa wafanyabiashara hao na kuahidi kujibu hoja zao kupitia kikao cha pamoja.

Prof. Kitila amesema kuwa wafanyabiashara ndio walipa kodi wakubwa kwa Manispaa ya Ubungo na Serikali hivyo ni wajibu wa Serikali kuhakikisha wafanyabiashara wanakuwa na mazingira mazuri ya kufanya biashara ikiwemo kuwapa elimu ya ushuru, tozo ada na kodi mbalimbali za manispaa na faida zake kwa jamii.

"Kazi yangu ni kuwa kiungo kati ya Serikali na wananchi na hili nimelitekeleza kwa kuhakikisha kikao hiki kinafanyika ili kufahamu changamoto na kukubaliana namna bora ya kufanya biashara ikiwemo uwepo wa  uwazi wa sheria zinazozimamia biashara amefafanua prof. Mkumbo

Kwa upande wake Mwenyekiti wa wafanyabiashara Wilaya ya Ubungo ndg. Kelvin Pascali  amemshukuru mbunge kwa kutimiza ahati yake lakini pia serikali kufanikisha kikao hiki mhiumu kinachotupa fursa ya kujadili changamoto, fursa na kupata elimu ya kodi hasa zile zinazotutatiza  

Kelvin amesema utaratibu huu wa kukutana  uwe endelevu ili wafanyabiashara waone fahari kufanyabiashara katika Wilaya hii na hivyo kulipa kodi kwa hiari kama serikali inavyoelekeza.

Kwa upande wake Mkurugenzi wa Manispaa ya Ubungo Beatrice Dominic  amewashukuru wafanyabiashara kwa kushiriki kikao hicho mhimu na kuahidi utoaji wa elimu kwa wafanyabiashara  kufanyika kila kata ili kuondoa changamoto ya ufinyu wa elimu kwa mlipa kodi.