UBUNGO YAINGIA SITE

Posted on: October 13th, 2023

Ikiwa ni maandalizi ya kukabiliana na madhara/maafa yatokanayo na Mvua za El - nino zinazotarajiwa kuanza  kunyesha kuanzia mwezi oktoba mpaka februari mwaka huu, Manispaa ya Ubungo imeanza zoezi la kusafisha mito ili kuruhusu maji kupita kwa urahisi bila kusababisha maafa kwa wananchi walio karibu na mito hiyo

Manispaa ya Ubungo inatekeleza maagizo yaliyotolewa na Mkuu wa Mkoa Albert Chalamila pamoja na Mkuu wa Wilaya Hashim Komba kuhakikisha maeneo hatarishi yote yanazingatiwa kwa kuhakikisha  mvua  hizo zikitokea hazileti maafa kwa wananchi hasa kwa wale wanaoishi karibu na mito

Akielezea tangu kuanza kwa zoezi hilo, Mkuu wa Kitengo cha Maliasili na  Uhifadhi wa Mazingira  Ndg. Nice Vahaye amesema kuwa zoezi la usafishaji wa mito lilianza toka jumamosi ya tarehe 7 oktoba 2023 ambapo mpaka sasa Mto Ng'ombe uliopo Kata ya Ubungo na mto China  uliopo kata ya Makurumla usafishaji wa mito hiyo unaendelea kufanyika

Aliendelea kusema kuwa, lengo ni kuondoa hatari ya kupata madhara ya  mvua katika makazi ya watu na ili kufikia lengo hilo Manispaa ya Ubungo  inashirikiana na Serikali za Mitaa ambapo utoaji wa elimu kuhusiana na utunzaji wa mazingira sambamba na kuwaasa wananchi wanaoishi mabondeni kuondoka kabla ya mvua kuanza unafanyika.

Pamoja na usafishaji wa mito, Vahaye ameeleza kuwa uchimbaji holela wa mchanga kwenye mito imekuwa chanzo kikubwa cha kuharibu mazingira hususani kupanua mito hiyo hali inayopelekea kuharibu makazi na kusababisha mafuriko kipindi cha mvua

"Niwape Rai wananchi wote wa Wilaya ya Ubungo kuacha mara moja uchimbaji wa mchanga holela katika mito kwani ni hatari na kuacha shughuli zote za kijamii ndani ya mito au mita 60 kuanzia kwenye chanzo cha mto" alisisitiza Vahaye

Vahaye aliendelea kusema kuwa, elimu itaendelea kutolewa ya utunzaji wa mazingira na kujikinga dhidi ya majanga hata baada ya zoezi la kusafisha mito kukamilika