UBUNGO YAJIPANGA KUONGEZA WANACHAMA BIMA YA CHF ILIYOBORESHWA

Posted on: August 21st, 2023

Maafisa uandikishaji wa CHF iliyoboreshwa wa Halmashauri ya Manispaa ya Ubungo wamejipanga kuendelea kutoa elimu kwa Wananchi ili kuongeza idadi ya wanufaika wa huduma za afya kutoka asilimia 7.6 ya sasa hadi kufikia asilimia 13 ifikapo Juni 2024.

Hayo yamebainishwa na Mratibu wa mfuko wa Bima hiyo iliyoboreshwa wa Manispaa  ya Ubungo  Bi. Reticia wakati wa kufungua kikao kazi kwa Maafisa uandikishaji wa Manispaa hiyo lengo ikiwa kujadili na kupanga mkakati wa kuhamasisha utoaji elimu kwa  jamii ili kuongeza idadi ya wanachama wa Bima hiyo na kuboresha huduma.

"Nimeona tukutane na tupange mikakati ya pamoja ya namna ya kuhamasisha jamii kujiunga na mfuko wa bima ya CHF iliyoboreshwa kwa kutoa elimu kwa wananchi katika maeneo mbalimbali yenye mikusanyiko ikiwemo Masokoni, Viwandani, Taasisi, Shule na Makampuni".

Aidha, Maafisa uandikishaji pia wamesisitizwa kutumia mikutano na vikao mbalimbali ngazi ya Mitaa na Kata kutoa elimu kwa jamii, utaratibu wa  kujiunga na faida za kutumia bima hiyo ya gharama nafuu sana  kwa wananchi hasa wa kipato cha chini.

Pamoja na kutoa elimu hiyo kwenye mikusanyiko ya watu, Bi. Reticia amesema matumizi ya vyombo vya habari na matangazo ni moja ya njia watakayotumia kuelimisha wananchi wengi zaidi kujiunga na bima hiyo ambayo inamwezesha mwanachama kupata matibabu kuanzia ngazi ya Zahanati hadi Hospitali ya Mkoa popote nchini.

Aidha, amesema hadi kufikia Juni 2023 jumla ya wanachama 40384 wamejiunga na Bima ambapo kati ya hao 6516 wamejinga mwaka huu 2023.

Kuhusu matibabu , Bi. Reticia amesema  hadi kufikia Juni 2023 jumla ya wanachama 12499 walipatiwa huduma za Afya kwenye vituo vya kutolea huduma ambapo jumla ya shilingi 185,330,000 zilikusanywa kutoka kwa wanachama na shilingi 65,374,991 zimerudishwa katika vituo vya kutolea huduma kwa ajili ya kuboresha utoaji huduma za afya vituoni.

Akiongea kwa niaba ya maafisa uandikishaji Bi. Sabina Balilo ameipongeza Manispaa kwa kuweka kikao hicho na kwamba kimeongeza chachu ya kujipanga vizuri kila mmoja kwenye eneo lake ikiwemo kushirikiana na viongozi kuanzia ngazi ya Shina, Wenyeviti wa mitaa na Kata

Mmoja wa maafisa uandikishaji akitoa elimu