UBUNGO YAJIPANGA NA UTOAJI WA CHANJO YA POLIO AWAMU YA TATU

Posted on: August 31st, 2022

Kamati ya Afya Msingi Ngazi ya Wilaya imekutana kujadili namna itakavyowezesha zoezi la utoaji wa chanjo ya Polio  kwa watoto walio chini ya miaka mitano awamu ya tatu litakalo fanyika kuanzia tarehe 1 - 4 septemba, 2022 ambapo   watoto 174,588 wanatarajiwa kupatiwa chanjo hiyo 

Akiwasilisha Taarifa ya zoezi la utoaji wa chanjo kwa awamu ya pili na ya kwanza Mganga Mkuu Manispaa ya Ubungo Dkt. Peter Nsanya amesema kuwa kwa awamu zote mbili zoezi lilifanikiwa na kuvuka lengo ambapo kwa awamu ya pili ilidhamiriwa kuwafikia watoto 168,010  na kufanikiwa kuvuka lengo mpaka kufikia  asilimia 113% 

Dr Nsanya amesema kuwa katika zoezi la utoaji wa chanjo awamu ya tatu Wilaya ya ubungo ina jumla ya timu 271 zitakazotoa huduma ya chanjo hiyo katika Vituo na nyumba kwa nyumba 

Nsanya, aliendelea kwa kusema kuwa chanjo ipo tayari katika Vituo vyote vya Afya na watoa huduma wapo na watapita nyumba kwa nyumba na watakaoenda kwenye Vituo vya kutolea huduma watapata chanjo hiyo.

Akifungua kikao hicho Mkuu wa Wilaya ya Ubungo ambaye ndie Mwenyekiti wa kamati hiyo Mhe. Kheri James amesisitiza wazazi wenye watoto wanao stahili kupata hiyo chanjo  kuhakikisha wanawapeleka kupata chanjo katika Vituo vilivyo Karibu yao

Aidha, Mkuu wa Wilaya amewasitiza viongozi wa dini na Serikali kuendelea kutoa hamasa Makanisani, Misikitini, masokoni na sehemu zingine ili zoezi liweze kufanikiwa na kufikia malengo.

Sambamba na hayo, Mjumbe wa kamati hiyo Ndg. Feruzi ameipongeza kamati kwa hatua iliyofikiwa  na kuhaidi kamati kuendelea kufanya hamasa zaidi ili kufanikisha zoezi