UBUNGO YAPANDA MITI 250 KUELEKEA 9 DISEMBA.

Posted on: December 7th, 2024

Mkuu wa Wilaya ya Ubungo Mhe. Hassan Bomboko Disemba 7, 2024 amewaongoza Watumishi na wakazi katika Mtaa wa Njeteni Kata ya kwembe  Wilayani humo kupanda miti katika shule maalum ya wasichana ya Mkoa wa Dar es Salaam  kuelekea maadhimisho ya miaka 63 ya Uhuru wa Tanzania Bara ambayo huadhimishwa kila mwaka tarehe 9 Disemba.

DC Bomboko amesema Wilaya ya Ubungo inatekeleza kwa vitendo maelekezo ya Mhe. Rais ya kutaka maadhimisho haya yafanyike kwa kufanya shughuli za kijamii ambapo Wilaya ya Ubungo imeendelea kufanya usafi wa mazingira,  kupanda miti pamoja na kufanya mazoezi kwa ajili ya kuimarisha ushirikishwaji wa wananchi.

DC Bomboko ameeleza kuwa " kwa siku ya leo tumefanikiwa kupanda miti 250 katika shule hii maalumu ya wasichana ambapo miti 100 ya matunda na miti 150 ya kivuli, rai yangu kwa uongozi wa shule ni kuhakikisha miti hii inatunzwa ili itumike kwa kivuli na matunda"

Akifafanua kauli mbiu ya maadhimisho hayo isemayo Uongozi madhubuti na ushirikishwaji wa wananchi ni msingi wa maendeleo yetu" DC Bomboko amesema kuwa ushirikishwaji wa wananchi ni mkubwa katika nyanja mbalimbali ikiwemo shughuli za kijamii na utekelezaji wa miradi ya maendeleo ambapo Wilaya ya Ubungo imepokea zaidi ya shilingi bilioni 104 kwa ajili ya utekelezaji wa miradi ya maendeleo ambayo wananchi wameshirikishwa

Vilevile usafi umefanyika katika vituo vya kutolea huduma za afya ikiwemo Kituo cha afya Kimara, Makuburi na hospitali ya Sinza palestina, masoko ya manzese, mabibo na simu2000 pia wameadhimisha sherehe za uhuru kwa kuhakikisha mazingira yanakuwa safi

Aidha, Mhe. Bomboko amewaalika wananchi wote wa wilaya hiyo kushiriki katika kuadhimisha  kilele cha sherehe hizo zitakazofanyika katika kituo cha mabasi cha Magufuli tarehe 9 desemba,2024 huku shughuli za upandaji miti, jogging na  burudani mbalimbali zitafanyika

Kwa upande wake Kaimu Mkuu wa Kitengo cha Maliasili na mazingira Manispaa ya Ubungo Bi. Nice Vahaye amesema kuwa Manispaa ya Ubungo inatekeleza shughuli mbalimbali za mazingira ambapo mpaka sasa zaidi ya miti laki tatu imepandwa katika maeneo ya wazi, taasisi, pembezoni mwa barabara na Mito